TÜRKİYƏDƏ AVTOMOBİL QƏZASINDA AZƏRBAYCAN VƏTƏNDAŞLARI DA YARALANMIŞDIR
Hadisə yerinə təcili surətdə polis, jandarmeriya və tibbi yardım dəstələri göndərilmişdir. Avtobusun 37 nəfər sərnişini Ərzincan dövlət xəstəxanasına aparılmışdır. Xəstəxanaya çatdırılan sərnişinlər arasında Azərbaycan Respublikasının vətəndaşları da vardır. Ərzincan polis idarəsi tərəfindən AZƏRTAC-ın xüsusi müxbirinə verilən ilkin məlumata görə, Azər adında 1994-cü il təvəllüdlü 9 yaşında bir uşaq itkin düşmüşdür. Onun axtarılması davam edir.
Ərzincan dövlət xəstəxanasının baş həkimi Hilmi Sevinc AZƏRTAC-ın müxbirinə demişdir ki, qəzadan sonra xəstəxanaya gətirilən azərbaycanlı sərnişinlər müayinədən keçirilir. Bizim məlumatımıza görə, qəzada ölən olmamışdır. Sərnişinlərin adları və soyadlarını müəyyənləşdirmişik. Yaralılara gərəkli lazımi tibbi yardım göstəriləcəkdir.
Azərbaycan Respublikasının Türkiyədəki səfiri Məmməd Əliyevin verdiyi məlumata görə, qəzaya uğramış avtobusda 15 nəfər Azərbaycan vətəndaşı olmuşdur. Onlardan 7-si yaralanmış, bir nəfər itkin düşmüşdür. Vətəndaşlarımızın səhhəti ilə yaxından maraqlanırıq. Ərzincan valisi və dövlət xəstəxanasının baş həkimi ilə mütəmadi əlaqə saxlayırıq. Vətəndaşlarımızın siyahısı müəyyənləşdirilmişdir. Vətəndaşlarımızın səhhəti normaldır. Qəza nəticəsində ciddi xəsarət alan olmamışdır. Onların Vətənə qayıtması üçün lazımi tədbirlər görülür.
