QAN YADDAŞI
TÜRKİYƏDƏ AZƏRBAYCAN HƏQİQƏTLƏRİNİ ƏKS ETDİRƏN SƏNƏDLİ FİLMİN ÇƏKİLİŞLƏRİNƏ BAŞLANMIŞDIR
Ankara, 24 fevral (AZƏRTAC). Türkiyədə dünya ictimaiyyətinə Azərbaycan həqiqətləri və Xocalı soyqırımının dəhşətli nəticələri ilə bağlı obyektiv məlumatlar çatdırmaq, erməni vandalizminin mahiyyətini açmaq məqsədilə sənədli filmin çəkilişlərinə başlanmışdır.
Ankara Qazi Universiteti beynəlxalq münasibətlər fakültəsinin aspirantı, soydaşımız Elnur Paşanın müəllifi olduğu film “ATA” TV-nin texniki dəstəyi ilə reallaşdırılır. Bu ekran əsəri yalnız Xocalı soyqırımından deyil, ümumilikdə ermənilərin əsrlər boyu azərbaycanlıların başına gətirdikləri faciələrdən, Qarabağ münaqişəsinin başlanmasından və erməni terror təşkilatlarının Azərbaycanda törətdikləri qanlı aksiyalardan bəhs edir.
Sənədli filmdə Türkiyənin tanınmış tarixçiləri - “Türksam” Araşdırmalar Mərkəzinin rəhbəri Sinan Oğan, Türk Tarix Qurumunun keçmiş başqanı Yusif Hallaçoglu, Maras erməniləri üzrə araşdırmaçı Nejla Günay və digərlərinin fikirləri yer alır.
Xocalı soyqırımının 17-ci ildönümü ərəfəsində çəkilişləri tamamlanacaq sənədli filmin artıq Türkiyənin bir neçə nüfuzlu telekanalında yayımlanması ilə bağlı razılıq əldə olunmuşdur. Bundan əlavə, filmin SD formatında Türkiyədə və əksər Avropa ölkələrində yayılması da nəzərdə tutulur.