REGİONLAR
Türkiyənin iki professoru MDU-da fəaliyyətə başlayıb
Bakı, 23 sentyabr, AZƏRTAC
Qardaş Türkiyənin iki alimi - Qazi Universitetinin professoru Cemal Yılmaz və Ankara Hacı Bayram Veli Universitetinin (AHBVU) professoru Evren Güçer Mingəçevir Dövlət Universitetində (MDU) fəaliyyətə başlayıb.
Bu barədə AZƏRTAC-a MDU-dan bildirilib. Qeyd olunub ki, bu münasibətlə MDU-nun rektoru Şahin Bayramov türkiyəli alimlərlə görüşüb. MDU ailəsinin üzvləri kimi onları salamlamaqdan məmnunluğunu ifadə edən rektor qardaş ölkənin tərəfdaş universitetləri ilə əməkdaşlığın dinamik inkişafından və məhsuldar nəticələrindən bəhs edib. Cari tədris ili daxil olmaqla son 3 tədris ilində Türkiyənin nüfuzlu universitetlərinin alimlərinin MDU-da fəaliyyətini bunun bariz nümunələrindən olduğunu bildirən Ş.Bayramov artıq işbirliyində ənənəvi xarakter alan bu müsbət tendensiyanın universitetin müasirləşməsi istiqamətindəki fəaliyyətlərinə əhəmiyyətli töhfə verdiyini diqqətə çatdırıb. Hər iki alimin MDU-nun potensialının güclənməsinə dəstək göstərəcəyinə əminliyini bildirən rektor onlara gələcək fəaliyyətlərində uğurlar arzulayıb.
Türkiyəli professorlar göstərilən diqqətə və yaradılan imkanlara görə minnətdarlıqlarını bildirib və MDU-nun gələcək uğurlarına töhfə verməyə çalışacaqlarını vurğulayıblar.
Qeyd edək ki, Cemal Yılmaz MDU-da mühəndislik profili üzrə, Evren Güçer isə turizm profili üzrə kadr hazırlığının keyfiyyətinin daha da yüksəldilməsində fəal iştirak edəcək.
Bölmənin digər xəbərləri
