Türkiyənin İqlim Dəyişikliyi Bürosunun rəhbəri: Azərbaycanlı qardaşlarımız COP31-ə Türkiyənin namizədliyində bizə dəstəkdirlər
Bonn, 24 iyun, AZƏRTAC
Ötən il COP29 bizim qardaş dövlətimiz, ölkəmiz, öz yurdumuz hesab etdiyimiz və bizi qardaş qəbul edən Azərbaycanda keçirildi və çox önəmli qərarlar qəbul olundu. Bir sıra problemli qərarlar öz həllini məhz Azərbaycanda baş tutan COP29-da tapdı.
Bu barədə AZƏRTAC-a müsahibəsində Bonn İqlim Sammitinin iştirakçısı, Türkiyənin İqlim Dəyişikliyi Bürosunun rəhbəri Halil Hasar deyib.
“Bunlardan biri maliyyə məsələsi idi: 300 milyard dollarlıq maliyyə hədəfi haradan qaynaqlanacaq? - yatırımlar hesabına, yoxsa kənardan daxil olacaq təşkilat və ya maliyyə qurumlarının vəsaiti hesabına. Daha sonra “Bakıdan Belemə Yol Xəritəsi” üzrə 1.3 trilyon dollarlıq ambisiyalara çatmaq hədəfi təyin olundu. Bu, çox vacibdir. Lakin bu qərarın alınması qədər onun icrası da çox böyük əhəmiyyət kəsb edir. Bonn İqlim Sammitində bu maliyyələşmə mexanizminin necə formalaşdırılacağını müzakirə etsək də, yekun qərar Belemə qaldı. Buna görə “Bakıdan Belemə Yol Xəritəsi” üzrə 1.3 trilyon dollarlıq hədəfin reallaşması üçün tərəflər səy göstərir. Fikrimcə, COP30-un qarşısında bir neçə önəmli hədəf durur. Bunlardan biri məhz maliyyədir. Orada bu məsələnin həllinin tapılıb-tapılmayacağına dair fikrim yoxdur. Ancaq Bakıda reallaşan müzakirələr göstərdi ki, çətin olsa da, amma bir şəkildə mütləq olacaq.
Həmçinin Bakıda İqlim dəyişmələri və ədalətli keçid, “uzlaşma indikatorları” isə bu keçid prosesindəki irəliləyişi ölçmək üçün istifadə edilən göstəricidir. 2000 ilə 4000 arasında “uzlaşma indikatorları” ifadəsi var.
COP30 komandasına COP29 Sədrliyinin, yəni Azərbaycanın kömək edəcəyini bilirik. Bonn İqlim Sammitində də bu davam etdi.
Braziliya komandasının fəaliyyətini uzun illərdir ki, izləyirik. Çox təcrübəli bir komandadır. Həm COP sədrləri, həm COP icraçı direktoru Ana Toni olsun, digər üzvlər olsun, güclü bir komandadır. Ancaq Azərbaycanın köməyinə ehtiyacları var.
Biz Türkiyə olaraq COP30, COP29-da Azərbaycana əlimizdən gələn bütün dəstəyi göstərdik. Bu bizim vəzifəmizdir. Gözləyirdik ki, COP29 Sədrliyi, yəni Azərbaycan - bizim qardaşlarımız, COP31 üçün Türkiyənin namizədliyində bizə dəstək göstərsinlər. Bunu da göstərdilər, hər mövzuda həm dəstəklərini göstərirlər, həm də yanımızda olurlar. Mən bu vəsilə ilə ölkəm adından Azərbaycana minnətdaram”.
Bölmənin digər xəbərləri
