TÜRKMƏNİSTANDA BUZ SARAYI AÇILMIŞDIR

19.05.2006 [18:14]
Çap et
A⁺ A^-

AZƏRTAC-ın İTAR-TASS-dan aldığı xəbərə görə, Türkmənistanda Buz sarayının açılışı mərasimi olmuşdur. Bayram tamaşasını 150 Aşqabad məktəblisi açmışdır. Onlar uzun müddət diyircəklər üzərində məşq etmiş və yalnız mayın əvvəllərində buz üzərində konki sürmək imkanı qazanmışlar. Sarayın bəzəkli qübbəsi altında temperatur 20-24 dərəcəni keçmir. Min nəfərlik tamaşa salonunda oturacaqlar statistik qızdırıcı ilə təchiz olunmuşdur.

İndi türkmənistanlılar bu isti ölkə üçün ekzotik konkisürmə idmanı ilə məşğul ola, xokkey oynaya biləcəklər.

Stadionun tikilməsini 2 il əvvəl Türkmənistan Prezidenti Saparmurad Niyazov təklif etmişdi. Orta Asiya regionu üçün nadir idman-əyləncə qurğusunun layihəsini Aşqabaddakı bir çox iri qurğuların baş podratçısı olan Fransanın “Buiq” şirkəti hazırlamışdır. Layihənin dəyəri 21,5 milyon dollardır.

Açılış mərasimində Fransanın 14 tanınmış fiqurlu konkisürəni, o cümlədən 2006-cı il dünya çempionatının gümüş mükafatçısı Brian Juber çıxış etmişlər.

İlin sonunadək ölkədə “Türkmən nağılları aləmi” adlı Disneyləndin, su Olimpiya stadionunun və Gənclər teatrının tikintisi başa çatacaqdır.