UEFA BUKMEKERLƏRİ NƏZARƏTDƏ SAXLAMAQ NİYYƏTİNDƏDİR
AZƏRTAC Avropa Futbol Assosiasiyaları İttifaqının (UEFA) rəsmi saytına istinadla xəbər verir ki, UEFA futbol totalizatorlarına nəzarəti gücləndirmək və oyunların nəticələrinə ədalətsiz yolla müdaxilə cəhdlərini izləməyi sadələşdirmək məqsədi ilə bukmeker xidməti bazarında ən iri şirkətlərdən biri ilə saziş imzalamışdır.
Sazişin şərtlərinə görə, UEFA bukmeker bazarından daha çox informasiya ala biləcəkdir. Həmin sənəd sayəsində UEFA bu və ya digər məqamla bağlı şübhə yarandıqda adı çəkilən bukmeker kontorunun informasiyasından istifadə etməklə, ədalətsizlikdə şübhəli sayılan barədə məlumat ala bilər.
Ədalətli oyunun ruhuna uyğun gəlməyən hallar aşkara çıxdıqda, UEFA, iri məbləğdə pul cəriməsi, klubların beynəlxalq turnirlərdən çıxarılması və ya ayrı-ayrı adamların futbolla bağlı istənilən fəaliyyətinə qadağa qoyulması da daxil olmaqla, müxtəlif sanksiyalar tətbiq edə bilər.
Bölmənin digər xəbərləri
