“UKRAYNA” MEHMANXANASI İKİ DÖVRÜN RƏMZİDİR
Moskva, 28 aprel (AZƏRTAC). Stalin hakimiyyəti illərində Moskvanın mərkəzində inşa edilmiş “Ukrayna” mehmanxanası əsaslı bərpa olunduqdan sonra yeni statusda istifadəyə veriləcəkdir. “Radisson Royal Hotel, Moskow” brendi ilə fəaliyyət göstərəcək beşulduzlu mehmanxana, heç şübhəsiz, dünyanın ən yaxşı hotelləri arasında liderlik edəcəkdir. İki dövrün rəmzi olan bu məkanda Stalin dövrünün monumental üslubu ilə müasir Avropa lüks üslubunun vəhdət təşkil etməsi mehmanxananı daha cəlbedici edir. Dəyəri 300 milyon dollar təşkil edən mehmanxananın layihəsi üzərində işləyən 10 mindən yuxarı adam arasında həmvətənlərimiz də vardır.
Mehmanxananın irimiqyaslı yenuidən qurulması layihəsini həmvətənimiz, əslən Quba rayonundan olan istedadlı sahibkar, “Forbs” jurnalının versiyasına görə dünyanın ən zəngin 100 adamından biri sayılmış Qod Nisanov və onun heç də az məşhur olmayan biznes dostu, Rusiyada ad-san qazanmış daha bir həmyerlimiz Zarax İliyev reallaşdırmışlar. Qod Nisanov “Kiyevskaya ploşad” QSC-nın Direktorlar Şurasının sədri, Moskvada iri “Avropa” Ticarət-Əyləncə Kompleksinin sahibidir. Göz qabağında olmağı sevməyən sahibkar iş görməyi danışmaqdan üstün tutur. Q, tarixi vətənini sevməklə kifayətlənməyib, tərbiyə olunduğu Azərbaycan ənənələrinə qayğı ilə yanaşan, Azərbaycan dilini unutmayıb, onu daim işlədən, mentallığımızın oxşarlığının həyatda uğur qazanmağın rəhni hesab edən çox az sayda insanlardan biridir. Sahibkar haqqında danışanlar bildirirlər ki, Qod qazandığı uğurları ilə öyünmür, yalnız ətrafındakı insanların xoşbəxt və firavan yaşadıqlarını görəndə özünü xoşbəxt sayır.
Yeni istifadəyə verilmiş mehmanxana dəbdəbəli nömrələrdən, restoranlardan, konfrans-mərkəzlərindən və 50 metrlik hovuza malik vellnes-klublardan və hətta Azərbaycan hamamından ibarətdir. Bir sözlə, ultramüasir hotel bütün imkanları ilə qonaqların xidmətində duracaqdır. Mehmanxananın dəbdəbəsindən, təmtəraqlı interyerindən və onu bəzəyən nadir sənət əsərlərindən danışmaq uzun çəkər. Hoteldə XX əsrin birinci yarısında yaşayıb yaratmış rus rəssamlarının 1200 əsərinin əsli nümayiş etdirilir. Burada Stalinin şəxsən seçdiyi nadir çilçıraqlar asılmışdır. Birinci mərtəbənin məhkəzi hollunda nadir eksponat - “Moskva SSRİ-nin paytaxtıdır” dioramı yer almışdır. Dioramda Moskvanın 1977-ci ildəki tarixi mərkəzinin kiçildilmiş təsviri nümayiş etdirilir. Xidmətlər paketini genişləndirmək məqsədi ilə buzdan müasir ekskursiya yaxt-salonları inşa edilmiş, donanma isə “Ukrayna” mehmanxanasına bitişik körpüyə “yan almışdır”.
Mehmanxananın rəsmi açılış mərasimi aprelin 28-nə nəzərdə tutulmuşdur. Mərasimdə Moskva meri Yuri Lujkov və paytaxtın digər rəsmi şəxsləri iştirak edəcəkdir.
Asya Hacızadə
AzərtAc-ın xüsusi müxbiri
Moskva
Bölmənin digər xəbərləri
