Ukrayna “Patriot”un analoqunun hazırlanması üzərində işləyir
Kiyev, 12 aprel, AZƏRTAC
Ukraynanın müdafiə sektoru və hökuməti xarici tərəfdaşlarla danışıqlar aparır və “Patriot” hava hücumundan müdafiə sisteminin analoqunu yaratmaq üçün öz layihələri üzərində işləyir. O, yalnız ABŞ tərəfindən təchiz edilir və bu gün Rusiya ballistik raketlərini vura bilən yeganə qurğudur.
AZƏRTAC “RBK-Ukrayna”ya istinadla xəbər verir ki, bu barədə brifinqdə Ukraynanın strateji sənaye naziri German Smetanin məlumat verib.
"Hazırda Ukrayna ərazisində "Patriot" hava hücumundan müdafiə raket sistemlərinin analoqu yoxdur, lakin bizim müdafiə sənayemizin müvafiq layihəsi var və biz onun üzərində işləyirik", deyə Smetanin bildirib.
Dünyanın analoji sistemlər istehsal edə bilən digər ölkələrinə gəlincə, nazir qeyd edib ki, belə ölkələr var və Ukrayna artıq qismən lokallaşdırma ilə bağlı danışıqlar aparır.
"Amerikanın bu sistemləri istehsal etdiyi tərəfdaşları var. Analoq istehsalçıları, o cümlədən "Patriot" şirkəti ilə Ukraynada bu sistemlərin istehsalının qismən lokallaşdırılması ilə bağlı bir sıra danışıqlar aparmışıq. Hazırda belə danışıqlar aparılır, aktiv iş gedir", - deyə Smetanin əlavə edib.
Xatırladaq ki, Ukrayna hazırda Rusiya ballistik raketlərini vura bilən hava hücumundan müdafiə sistemlərinə görə tamamilə ABŞ-dan asılıdır.
Rusiyanın ballistik raketlərini yalnız “Patriot” sistemləri vasitəsilə vurmaq olur.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
