Ukrayna rəsmi Vaşinqtondan münaqişənin həllinə dair ikinci sənəd də alıb
Kiyev, 24 noyabr, AZƏRTAC
Ukrayna dövləti sülh planı ilə yanaşı, rəsmi Vaşinqtondan münaqişənin həllinə dair ikinci sənəd də alıb.
AZƏRTAC xəbər verir ki, “RBK-Ukrayna”nın yaydığı məlumata görə, “Ukrayna üçün Təhlükəsizlik Təminatları üzrə Çərçivə Sazişi” adlı digər əlavə sənədin mətnində “NATO-nun 5-ci maddəsinin prinsipləri əsasında modelləşdiriləcəyi” bildirilir. Bu Çərçivə Sazişi üç bənddən ibarətdir.
Birincisi, Rusiya Federasiyasının Ukraynaya təkrar silahlı hücumu zamanı ABŞ Prezidentinin silahlı qüvvə, kəşfiyyat və maddi-texniki dəstək, iqtisadi və diplomatik tədbirlər və məqsədəuyğun hesab edilən digər addımlar tətbiq edə biləcəyini nəzərdə tutur.
İkinci bənddə göstərilir ki, NATO üzvləri - Fransa, İngiltərə, Almaniya, Polşa və Finlandiya ABŞ-la birgə hərəkət etməyi öhdələrinə götürürlər.
Üçüncü bənddə deyilir ki, bu Çərçivə Sazişi uzadılma imkanı ilə on il müddətində qüvvədə olacaq.
28 bəndlik sülh planında olduğu kimi, ABŞ-ın təhlükəsizlik təminatı ilə bağlı bu Çərçivə Sazişi də yekun deyil və çox güman ki, düzəliş ediləcək.
Xatırladaq ki, noyabrın 20-də ABŞ Ukrayna ilə bağlı 28 bəndlik sülh planını təqdim edib. Sənədə əsasən, Ukrayna Donbasdan çıxmalı, ordusunu azaltmalı, uzaqmənzilli silahlardan imtina etməlidir və s.
Bazar günü, noyabrın 23-də sənədin Kiyev üçün daha əlverişli olması üçün Cenevrədə ABŞ, Ukrayna və Avropa arasında məsləhətləşmələr keçirilib.
Danışıqlardan sonra Ukrayna və ABŞ sülh üçün yenilənmiş və yenidən işlənmiş çərçivə sənədi hazırlayıb və yaxın günlərdə birgə təkliflər üzərində intensiv işi davam etdirmək barədə razılığa gəliblər.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
