Ukraynalı uşaqlar Qəbələ Dövlət Tarix-Bədii Qoruğu ilə tanış olublar
Qəbələ, 24 oktyabr, Mustafa Dadaşov, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyinin təşkilatçılığı ilə ölkəmizə gətirilən və Qəbələ Uşaq Reabilitasiya Mərkəzinə yerləşdirilərək reabilitasiya tədbirlərinə cəlb olunan bir qrup ukraynalı uşaq Qəbələ Dövlət Tarix-Bədii Qoruğu və Arxeoloji Mərkəzinə səfər edib.
Qoruqdan AZƏRTAC-ın bölgə müxbirinə bildirilib ki, ukraynalı uşaqlar əvvəlcə Qəbələ Arxeoloji Mərkəzində sərgilənən arxeoloji materiallarla tanış olublar.
Arxeoloji Mərkəzin akt zalında keçirilən görüşdə qoruğun direktoru Zahir Kərimov ukraynalı uşaqlara Tarix-Bədii Qoruğun və Mərkəzin fəaliyyəti barədə ətraflı məlumat verib.
Uşaqlar “Qafqaz Albaniyasının paytaxtı – Qəbələ” sənədli filmini izləyiblər.
Sonra qoruğun tarixi məkanları - Səlbir və Qala ərazilərində aparılmış arxeoloji qazıntı sahələri ilə tanışlıq olub. Yerli və xarici ölkə arxeoloqlarının iştirakı ilə burada aparılmış arxeoloji qazıntılar, aşkar olunan tapıntılar barədə ətraflı məlumat verilib.
Bölmənin digər xəbərləri
