Bakı, 20 sentyabr, AZƏRTAC

Sentyabrın 20-də Fövqəladə Hallar Nazirliyi (FHN) Ümummilli Lider Heydər Əliyevin 100 illiyinə həsr olunmuş “Əsrin müqaviləsi – Azərbaycanın strateji inkişaf konsepsiyasının təməlidir” mövzusunda konfrans keçirib.

FHN-in Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyində təşkil edilən konfransda nazirliyin Aparatı və strukturuna daxil olan qurumlarının, SOCAR-ın “Azneft” İstehsalat Birliyinin və Yeni Azərbaycan Partiyası Xətai rayon təşkilatının nümayəndələri iştirak ediblər.

Nazirliyin mətbuat xidmətindən AZƏRTAC-a verilən məlumata görə, əvvəlcə konfrans iştirakçıları Ulu Öndər Heydər Əliyevin büstü önünə gül dəstələri düzüb, dahi rəhbərin əziz xatirəsi ehtiramla yad olunub. Həmçinin Ümummilli Liderin həyat və fəaliyyətini əks etdirən fotoşəkillərdən ibarət sərgi ziyarət olunub.

Tədbir Ulu Öndər Heydər Əliyevin və Azərbaycanın ərazi bütövlüyü uğrunda canlarını fəda etmiş şəhidlərimizin əziz xatirəsinin bir dəqiqəlik sükutla anılması ilə başlanıb.

Konfransda fövqəladə hallar nazirinin müavini Tapdıq Əmiraslanov çıxış edərək əsası Ümummilli Lider tərəfindən qoyulmuş və hazırda Prezident İlham Əliyevin rəhbərliyi ilə uğurla davam etdirilən neft strategiyasının ölkəmizə qazandırdığı uğurlardan, “Əsrin müqaviləsi”nin sosial-iqtisadi həyatımızdakı əhəmiyyətindən danışıb. Qeyd edilib ki, Ulu Öndər Heydər Əliyevin müəllifi olduğu yeni neft strategiyasının uğurla reallaşdırılması nəticəsində bu gün ölkəmiz Avropanın enerji təhlükəsizliyinin təmin edilməsi sahəsində etibarlı tərəfdaşa çevrilib. Prezident İlham Əliyevin rəhbərliyi ilə həyata keçirilən daxili və xarici siyasət sayəsində neft-qaz sektorunun inkişafında və ölkəmizin karbohidrogen ehtiyatlarının ixracı sahəsində mühüm nəticələr əldə olunub.

FHN-in Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin rəisi Vüsal Ağayev çıxışında xalqımızın və dövlətimizin taleyində mühüm rol oynayan “Əsrin müqaviləsi”ndən danışaraq bildirib ki, Ulu Öndər Azərbaycanın imzaladığı bütün neft-qaz müqavilələrinin şərtlərini milli maraqlarımıza maksimum dərəcədə uyğunlaşdırıb. Beləliklə, Azərbaycan nəinki zəngin neft və qaz yataqlarının işlənilməsinə və enerji resurslarının hasilatına, həmçinin onların dünya bazarına çıxarılması üçün yeni ixrac marşrutlarının işə salınmasına və enerji nəqlinin şaxələndirilməsinə də nail olub. O deyib ki, Ulu Öndərin siyasi kursunu layiqincə davam etdirən Prezident İlham Əliyevin rəhbərliyi ilə aparılan dərin iqtisadi islahatlar, güclü sosial siyasət, insanların rifah halının yaxşılaşdırılması sahəsində atılan addımlar uğurlu bəhrələr verir, Agentlik tərəfindən sənaye təhlükəsizliyinin təmin olunması məqsədilə istehsalat sahələrində sağlam əmək şəraitinin yaradılması, müvafiq norma və qaydaların tələblərinə riayət olunması istiqamətində məqsədyönlü işlər aparılır.

Tədbirdə SOCAR-ın “Azneft” İstehsalat Birliyinin baş direktorunun birinci müavini, baş mühəndis Rövşən Qarayev çıxış edərək xalqımızı zamanın mürəkkəb tarixi-siyasi sınaqlarından uğurla çıxaran, müasir Azərbaycan dövlətinin banisi və qurucusu Heydər Əliyev tərəfindən imzalanmış “Əsrin müqaviləsi”nin əhəmiyyətindən danışıb, ölkəmizin siyasi, iqtisadi inkişafı, cəmiyyət və dövlət həyatının bütün sahələrində qazanılmış uğurlardan bəhs edib.

Konfrans Ümummilli Lider Heydər Əliyevin həyat və fəaliyyətindən bəhs edən sənədli filmin nümayişi ilə başa çatıb.