Uşaqların təhsildən yayınmasına və baxımsız qalmalarına səbəb olan amillər müzakirə edilib
Bakı, 1 sentyabr, AZƏRTAC
Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İnsan Alveri Qurbanlarına Yardım Mərkəzi və Suraxanı Rayon İcra Hakimiyyətinin birgə təşkilatçılığı ilə Suraxanı Gənclər Evində “Uşaqların təhsildən yayınması və baxımsızlığı insan alverinə şərait yaradan səbəblərdən biri kimi” mövzusunda tədbir təşkil edilib.
Agentliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, tədbirdə mövzunun aktuallığı, insanların hansı yollarla aldadılıb xarici ölkələrə aparılaraq insan alveri qurbanlarına çevrildiyi, həmin şəxslərin hansı istismara məruz qaldıqları və insan alverinə qarşı mübarizə üsulları barədə geniş məlumat verilib.
Həmçinin İnsan Alveri Qurbanlarına Yardım Mərkəzinin fəaliyyəti, insan alveri qurbanlarına göstərilən xidmətlər, onun mahiyyəti və formaları, uşaqlara xas aspektləri və uşaqların internet vasitəsilə cinsi istismara və ya zorakılığa cəlb olunmasından danışılıb.
İnteraktiv keçən görüşdə uşaqların təhsildən yayınmasının, baxımsızlığın və erkən nikahın səbəb olduğu insan alveri probleminin həll yolları barədə fikir mübadiləsi aparılıb.
Bölmənin digər xəbərləri
