UZAQ ŞİMALDA QƏRARLAŞMIŞ AZƏRBAYCANLI
Murmansk, 30 dekabr (AZƏRTAC). Kola yarımadasının ən qədim ali məktəblərindən biri olan Murmansk Dövlət Pedaqoji Universiteti bu yaxınlarda özünün 70 illiyini təntənəli surətdə qeyd etmişdir. Bakıda dünyaya göz açmış azərbaycanlı, fəlsəfə və sosiologiya kafedrasının professoru Cəlal Əhməd oğlu Rzayev 35 ildir ki, həmin universitetdə müəllimlik edir.
Professor Rzayevin qütb dairəsində həyat yolu çətin olmuşdur. Moskva Xarici Dillər Pedaqoji İnstitutunun ingilis dili bölməsini bitirən gənc mütəxəssis təyinatla Qırğızıstana göndərilmiş və o, həmin respublikada orta məktəbdə ingilis dili fənnindən dərs demişdir.
Cəlal Rzayevi hələ tələbəlik illərindən fəlsəfi məsələlər maraqlandırırdı. Elə buna görə də Qırğızıstan Dövlət Universitetinin fəlsəfə kafedrasının professoru Məsud Cunusov Cəlal Rzayevə sənədlərini fəlsəfə təmayüllü aspiranturaya təqdim etməyi məsləhət gördü.
Namizədlik dissertasiyasını müdafiə etdiyi dövrdə artıq Cəlal Rzayevin ailəsində iki uşaq böyüyürdü. Sanki hər şey əla idi: yaxşı iş, mehriban ailəsi vardı. Gözəl cənub şəraitində özün üçün yaşa!
Lakin Şimalda yaşayan dostlarının məsləhəti ilə Cəlal Rzayev Murmanska köçür və Qütb dairəsinin digər ali məktəbində - Murmansk Ali Mühəndis Dənizçilik Məktəbində bir neçə il müddətində fəlsəfə fənnindən dərs deyir.
35 il əvvəl isə Murmansk vilayəti rəhbərliyinin xahişi ilə sonralar universitet adlandırılan Murmansk Pedaqoji İnstitutuna işləməyə keçir. Bu gün 80 yaşlı veteran alim Cəlal Rzayev Kola yarımadasının intellektual elitası üçün yaxşı kadrlar hazırlayan həmin tədris müəssisəsinin qocaman müəllimlərindən biridir. Cəlal Rzayevin yetirmələri təkcə təhsil müəssisələrində deyil, bir çox elm, mədəniyyət və incəsənət sahələrində də fəaliyyət göstərirlər.
Professor Rzayev 50-dən çox elmi əsərin müəllifidir. Onu indiyədək doktorluq dissertasiyasını müdafiə etməməsi çox narahat edir.
Murmansk çoxmillətli şəhərdir, burada insana onun professional keyfiyyətlərinə görə hörmət edirlər. Bakıda dünyaya göz açmış professor Rzayev məhz dərin erudisiyası və düşüncə tərzinə görə həmkarları və tələbələr tərəfindən ehtiramla qarşılanır. Onun elmi əsərləri Rusiyanın hüdudlarından kənarda tanınır. C.Rzayev Hindistanda, ABŞ-da, Norveçdə mühazirələr oxumuşdur.
Elmin bugünkü inkişafı Cəlal Rzayevi çox narahat edir: bir çox tələbələr internetdən referatları çıxararaq, onları öz elmi əsərləri kimi təqdim edirlər. Bu da professor Rzayevdə hiddət doğurur. O deyir ki, biliyi anlayaraq qəbul etmək lazımdır, hazırda hər yerdə rast gəldiyimiz praqmatizm tənbəlliyə və mənəviyyatsızlığa bəraət qazandıra bilməz.
Azərbaycan torpağında dünyaya göz açmış, Uşaq Şimalda qərarlaşmış professor Cəlal Rzayev belə insandır.
Əlihüseyn Şükürov
Murmansk
Bölmənin digər xəbərləri
