Üzeyir Hacıbəyli Türk dünyasının ortaq səsi və dəyəridir
Ankarada dahi bəstəkar Üzeyir Hacıbəylinin irsinə həsr olunmuş konfrans, təqdimat və konsert keçirilib
Ankara, 18 sentyabr, AZƏRTAC
Azərbaycanda Milli Musiqi Günü münasibətilə sentyabrın 18-də Ankaradakı Qazi Universitetinin Memar Kəmaləddin adına konsert sarayında “Müsəlman Şərqinin ilk operanın müəllifi, Azərbaycan-Türki dünyası musiqisinin simvolu Üzeyir Hacıbəyli” adlı konfrans, təqdimat və konsert keçirilib.
AZƏRTAC xəbər verir ki, Türkiyədəki Azərbaycan Mədəniyyət Mərkəzinin təşkilatçılığı, Qazi Universiteti, Ankara Musiqi və Gözəl sənətlər Universitetinin dəstəyi ilə təşkil olunan tədbirdə diplomatlar, dövlət və beynəlxalq təşkilatların nümayəndələri, elm xadimləri, Türkiyədə təhsil alan azərbaycanlı tələbələr iştirak ediblər.
Tədbiri moderatoru Azərbaycanın Əməkdar artisti İslam Manafov, Üzeyir Hacıbəylinin əvəzolunmaz mirasından danışıb.
Hələ 1908-ci ildə 22 yaşında ikən “Leyli və Məcnun” operasını yazaraq müsəlman və dünya mədəniyyətinə bəxş edən dahi bəstəkarın əsl vətənpərvər pedaqoq olduğunu vurğulayan İ.Manafov Üzeyir Hacıbəylini “bütün Türk dünyasının incisi” adlandırıb.
Üzeyir Hacıbəylinin günümüzdə də Azərbaycan musiqi və sənətinə işıq tutduğunu deyən Əməkdar artist tədbiri təşkil edən Azərbaycan Mədəniyyət Mərkəzinə öz minnətdarlığını bildirib.
Tədbirdə çıxış edən Türkiyədəki Azərbaycan Mədəniyyət Mərkəzinin direktoru Samir Abbasov bildirib ki, Prezident İlham Əliyevin Azərbaycan professional musiqi sənətinin banisi, Müsəlman Şərqində ilk operanın müəllifi, Türk dünyasının görkəmli bəstəkarı, musiqişünas-alim, dramaturq, pedaqoq və ictimai xadim Üzeyir Hacıbəylinin anadan olmasının 140 illik yubileyinin dövlət səviyyəsində qeyd olunması haqqında imzaladığı Sərəncama əsasən Türkiyədə də çox sayda layihələr, nəşrlər, təqdimatlar və konsertlər həyata keçirilir.
Azərbaycanın və dünya mədəniyyət xəzinəsinin yaddaşında silinməz izlər buraxan musiqi dühasının qardaş Türkiyədə yad edilməsini qürurverici hadisə adlandıran S.Abbasov “Üzeyir Hacıbəyli Türk dünyasının ortaq səsi və dəyəridir. Biz inanırıq ki, Üzeyir Hacıbəylinin yaradıcılığı gələcəkdə daha geniş təbliğ olunacaq, onun yolunu davam etdirən musiqiçilər də Azərbaycanın şöhrətini bütün dünyaya yayacaqdır”, - deyə qeyd edib.
Digər çıxışçılar Qazi Universitetinin prorektoru, professor Hasan Tezer, Türk dünyası Araşdırmalar və Uyğulama Mərkəzinin rəhbəri, professor Bülent Aksoy, Ankara Musiqi və Gözəl sənətlər Universitetinin Türk xalq Musiqiləri bölümünün başkanı, professor Gökhan Ekim qeyd ediblər ki, Üzeyir Hacıbəyli əsərləri qəlblərə xitab edir, milli mədəniyyəti gücləndirməklə Anadoludan Qafqaza bir “könül körpüsü” yaratmışdı.
Görkəmli bəstəkara həsr olunmuş filmin nümayişi ilə davam edən tədbirdə Azərbaycan Mədəniyyət Mərkəzinin layihəsi ilə hazırlanmış “Azerbaycanlı bestecilerden piyano eserleri” adlı kitabın təqdimatı olub və Türkiyədə yaşayan azərbaycanlı sənətçilərin iştirakı ilə dahi Üzeyir Hacıbəylinin əsərləri əsasında konsert proqramı təqdim edilib.
Kitab Ankara Opera və Balet Teatrının mütəxəssisi Nailə Əhmədova tərəfindən tərtib olunub. Nəşrdə bir çox Azərbaycan bəstəkarlarının - Üzeyir Hacıbəyli, Müslüm Maqomayev, Soltan Hacıbəyov, Asəf Zeynallı, Səid Rüstəmov, Fikrət Əmirov, Qara Qarayev, Cövdət Hacıyev, Tofiq Quliyev, Vasif Adıgözəlov, Aqşin Əlizadə və s. fortepiano üçün not əsərləri yer alıb.
Kitabda dahi bəstəkar Üzeyir Hacıbəyli, onun yaradıcılığı, musiqi sənətinə verdiyi töhfələrə dair geniş məlumat verilib.
Tədbir çərçivəsində keçirilən konsert proqramında Ankara Opera və Baletinin mütəxəssisi, fortepianoçu Nailə Əhmədova, Azərbaycanın Əməkdar artisti İslam Manafov, opera sənətçiləri Ömer Türkmenoğlu, Ali Tuna Güney, Fidan Hüseynova Üzeyir Hacıbəylinin əsərlərindən parçalar səsləndiriblər.
Azərbaycan Mədəniyyət Mərkəzinin “Zəngəzur” Rəqs Ansamblı Üzeyir Hacıbəylinin repertuarından milli rəqslərlə çıxış ediblər.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
