Valtteri Bottas Bakıdakı uğursuzluğunu xatırlayır
Bakı, 24 dekabr, AZƏRTAC
Bu il “Mercedes”də azarkeşlər üçün ötən mövsümün bir qədər qeyri-adi icmalını hazırlayıblar: Lyuis Hemilton və Valtteri Bottas komandanın rəhbəri Toto Volffla birgə müxtəlif yürüş uik-endlərində ən yaxşı səciyyəvi anları əks etdirən fotoşəkilləri seçərək, onları kadr arxasında şərh ediblər.
AZƏRTAC “F1News.ru”ya istinadla xəbər verir ki, Valtteri Bottas əsasən F-1 Azərbaycan Qran-Prisində yolun kənarında çəkdirdiyi şəklin onun yürüş distansiyasından kənarlaşdıqdan sonrakı halını əks etdirdiyini təsdiqləyib. Bu yürüşdə onun qələbəyə gözəl şansı var idi.
Finlandiyalı finişə 3 dövrə qalmış lider olmasına baxmayaraq, Kevin Maqnussen və Pyer Qaslinin bolidlərinin möhkəm toqquşmasından sonra trasdakı qalıqların üzərindən keçmiş, bu, nəticədə şinlərin deşilməsinə və onun üçün yürüşün bitməsinə gətirib çıxarmışdı. V.Bottasın sözlərinə görə, bu, onun karyerası ərzində ən ağır anlardan biri idi.
Valtteri xatırlayaraq deyir: “Bakıdakı yürüşün mənim keçirdiyim ən yaxşı yürüşlərdən biri olduğunu fikirləşirdim. Mən çoxdan idi ki, lider olmurdum, lakin o vaxt mən birinci mövqeyə çıxa bilmişdim. Yadımdadır, mən özümə əmin idim və hiss edirdim ki, hər şey nəzarətim altındadır. Mən başa düşürdüm ki, qələbə üçün həm də bir az bəxtin gətirməsi lazımdır. Lakin baş yolda hansısa qalıqları görməyib üstündən keçdim. Şinlər deşildi və bununla yürüş mənim üçün başa çatdı.
Həmin hadisəyə qədər mən iki dəfə qələbəyə yaxın idim, iki dəfə finişə ikinci çatmışdım. Bu səbəbdən də mövsümdə ilk qələbəmi qazanmaq istəyirdim, lakin bu, yenə də baş vermədi.
Bakıda oyundan aralandıqdan sonra mən bütün komandanın kefinin pozulduğunu gördüm. Məni hamı dəstəkləyirdi, lakin mən otelə qayıtdıqda özümü saxlaya bilmədim, dizi üstə yıxılaraq uşaq kimi ağladım. Sonra ayağa qalxaraq öz-özümə “bir uğursuzluq məni sındırmayacaq” dedim”.
Mövsümün yekununa görə, Bottas şəxsi hesabda beşinci yer tutdu: onun 7 dəfə finişə ikinci çatması və bir dəfə “pole-position” mövqedən start götürməsinə baxmayaraq, həqiqətən ona ikinci yerdən yuxarı qalxmaq bir dəfə də olsun nəsib olmadı. Bu, Soçidə baş verdi, lakin taleyin qisməti elə gətirdi ki, F-1 Rusiya Qran-Prisi məhz Valtterinin yenidən uğura şansı olmağı ilə yadda qaldı. Lakin komanda bu işə qatıldığından Bottas ortağını irəli buraxmağa məcbur oldu. Əslində, onun şəksiz qələbəsini əlindən almışdılar. Bu, “Mercedes” yürüşçüsünün demək olar ki, yada salmaq istəmədiyi ən xoşagəlməz anlardan biridir.
Bölmənin digər xəbərləri
