Qəbələ, 3 oktyabr, Mustafa Dadaşov, AZƏRTAC

Müstəqillik illərində regionlarımızın sürətli inkişafını Qəbələ rayonunun timsalında daha aydın görmək olar. Bu gün Qəbələ yalnız füsunkar təbiəti, əsrarəngiz gözəlliyi ilə deyil, eyni zamanda, özünün dinamik inkişafı ilə seçilən rayonlardan biridir. Qəbələ ölkənin mühüm sənaye və turizm mərkəzlərindən birinə, həmçinin beynəlxalq miqyaslı mədəniyyət tədbirlərinin, festivalların, idman yarışlarının keçirildiyi məkana çevrilib.

İndi Qəbələ özünün yeni inkişaf dövrünü yaşayır. Regionların sosial-iqtisadi inkişafına dair dövlət proqramlarından irəli gələn vəzifələrin uğurlu icrası rayonun iqtisadi potensialının artmasına, infrastruktur təminatının, kommunal xidmətlərin keyfiyyətinin daha da yüksəlməsinə, əhalinin rifahının yaxşılaşmasına səbəb olub.

Regional inkişafa dair dövlət proqramlarının həyata keçirilməsində yerli icra strukturları ilə yanaşı, bələdiyyələr də yaxından iştirak edirlər. Qəbələ şəhərinin, eləcə də rayonun qəsəbə və kəndlərinin sosial-iqtisadi inkişafında, abadlıq-quruculuq işlərində və yerli əhəmiyyətli məsələlərin həllində bələdiyyələr öz fəallığını gündən-günə artırırlar. Bu gün Qəbələdə öz işini müasir dövrün tələblərinə uyğun şəkildə quran yerli özünüidarəetmə qurumlarından söz düşəndə, heç şübhəsiz ki, Vəndam bələdiyyəsinin adı xüsusilə qeyd olunur. Rayonun ən böyük yaşayış məntəqələrindən olan Vəndam qəsəbəsini və qonşu Seyidqışlaq kəndini əhatə edən bu bələdiyyə rayonun sosial-iqtisadi inkişafı prosesində yaxından iştirak edir, əhalinin güzəranının, sosial vəziyyətinin yaxşılaşmasına öz töhfəsini verir.

AZƏRTAC-ın bölgə müxbiri Vəndam qəsəbəsində olub, bələdiyyənin sədri Asif Həşimovla görülən işlər və qazanılan uğurlar barədə söhbət edib.

Bələdiyyə sədrinin məlumatına görə, ərazidə 3 mindən çox təsərrüfat var. Vəndam qəsəbəsində 10 min 600, Seyidqışlaq kəndində isə 600 nəfərədək əhali yaşayır. Qəsəbənin ümumi ərazisi pay torpaqları ilə birlikdə 6 min hektara yaxındır. Əhalinin əsas məşğuliyyəti heyvandarlıq, əkinçilik, meyvəçilikdir. Bundan əlavə, son illər ailə turizmi ilə məşğul olanların sayı da xeyli artıb. Çünki yay aylarında qəsəbəyə xeyli sayda yerli turist gəlir və onların böyük əksəriyyəti evlərdə qalmağa üstünlük verir. Turizmin inkişafı əhalinin gəlirlərinin artmasına da müsbət təsir göstərir.

Vəndam bələdiyyəsi yerli əhəmiyyətli məsələlərin həllində hər zaman sakinlərin yanındadır. Qəsəbənin abadlaşdırılması, daxili yolların asfaltlaşdırılması daim diqqət mərkəzindədir. Təkcə son iki ildə bələdiyyənin vəsaiti ilə 4 kilometr uzunluğunda qəsəbədaxili yola asfalt çəkilib. Bundan əlavə, Şəhidlər xiyabanı kompleksinin, Şəhidlər bulağının ərazisi asfaltlaşdırılıb. Bu günlərdə qəsəbənin mərkəzindəki 1 kilometr uzunluğunda yola da asfalt döşənib.

Asif Həşimovun sözlərinə görə, qəsəbə əhalisinin içməli su ilə təminatı kolxoz dövründə çəkilmiş daxili şəbəkə, həmçinin bələdiyyənin dəstəyi ilə son illər çəkilən və 3800 metr məsafədən gələn bulaq suyu ilə ödənilir. Bundan əlavə, qəsəbənin ərazisindəki dövlət vəsaiti ilə qazılmış subartezian quyusu üçün bələdiyyənin vəsaiti ilə 10 tonluq su çəni və paylaşdırıcı qurğu da alınaraq quraşdırılıb. Hazırda qəsəbə ərazisində hər bir fərdi ev içməli su xətti ilə təmin olunub.

Həmsöhbətimiz bildirib ki, qəsəbənin mərkəzindən respublika əhəmiyyətli magistral yol keçdiyi üçün bələdiyyə tərəfindən ərazinin abadlaşdırılmasına, təmiz saxlanılmasına, məişət tullantılarının saxlanc yerlərinə daşınmasına, yaşıllıqların qorunmasına, yeni yaşıllıq zolaqlarının salınmasına xüsusi diqqət yetirilir. Məişət tullantılarının daşınması üçün bələdiyyənin vəsaiti ilə bir ədəd özüboşaldan yük avtomobili alınıb, daha bir avtomobil icarəyə götürülüb. Vəndam çayının hövzəsində, bələdiyyə ərazisində, çay sularından uzaq bir yerdə tullantıların müvəqqəti saxlanması və torpağa basdırılması üçün müvafiq dövlət qurumlarının razılığı ilə xüsusi yer ayrılıb. Orada daimi olaraq təmizlik işləri aparılır, kanallar qazılır, tullantılar basdırıldıqdan sonra üstü örtülür. Qəsəbənin müxtəlif yerlərində, ayrı-ayrı məhəllələrdə sakinlər tərəfindən atılan tullantıların müvəqqəti toplanması üçün xüsusi saxlanc yerləri də yaradılıb. Əhali arasında maarifləndirmə işləri aparılıb, sakinlər tullantıları həmin yerlərə atırlar. Sonra texnikanın köməyi ilə tullantılar ərazidən kənara daşınır.

Bələdiyyə ərazisindəki qəbiristanlıqlarda sakinlərin də iştirakı ilə vaxtaşırı iməciliklər keçirilir, səliqə-sahman işi aparılır.

Torpaqlarımızın erməni işğalçılarından azad edilməsi uğrunda gedən döyüşlərdə Vəndam qəsəbəsinin igid oğulları da mərdliklə vuruşaraq şanlı Qələbənin qazanılmasına öz töhfəsini veriblər. Bələdiyyə sədri ilə söhbət zamanı məlum oldu ki, qəsəbə Birinci Qarabağ müharibəsində 17, Vətən müharibəsində isə 3 şəhid verib. Vəndamlılar Vətən uğrunda canlarından keçən şəhidlərimizlə, o cümlədən yalnız Qəbələnin deyil, bütün Azərbaycanın fəxr etdiyi qəhrəman oğullarımızdan olan Azərbaycanın Milli Qəhrəmanı, general-mayor Polad Həşimovla hər zaman qürur duyurlar.

Ərazi bütövlüyümüz uğrunda canlarından keçən qəhrəman Vətən oğullarının ailələrinə, eləcə də döyüşlərdə sağlamlıqlarını itirən qazilərə qəsəbə bələdiyyəsi tərəfindən daim diqqət və qayğı göstərilir. Bələdiyyə sədrinin sözlərinə görə, son vaxtlar Vətən müharibəsi qazisi Turan Muradovun mənzilinin təmir, Birinci Qarabağ müharibəsinin iştirakçısı Abdulhəmid Əzizovun evinin dam örtüyünün rənglənməsi üçün maddi yardım edilib. Digər qazilərə də müxtəlif məqsədlər üçün qəsəbə bələdiyyəsindən yardımlar verilib. Cari ilin sentyabrında Birinci Qarabağ müharibəsi əlili, həmçinin ahıl, xəstə sakinin müalicəsi, daha bir qazinin müalicə xərclərinin ödənilməsi üçün bələdiyyə tərəfindən vəsait ayrılıb.

Asif Həşimovun məlumatına görə, Vətən müharibəsində sağlamlığını itirən 5 qazinin ailəsinə Vəndam bələdiyyəsinin qərarı ilə pulsuz olaraq ümumilikdə 33 sot torpaq sahəsi verilib. Ayrılmış torpaq sahələrində indiyədək dövlət tərəfindən 3 ailə üçün ev tikilib. Tezliklə iki evin də tikintisinə başlanılacaq. Hazırda daha 6 qaziyə torpaq sahəsinin ayrılması üçün sənədləşmə işi aparılır.

Bundan əlavə, bu il yüksək balla ali məktəbə daxil olan bir tələbəyə bələdiyyə tərəfindən pul mükafatı verilib. Yeni dərs ili ərəfəsində maddi imkanları zəif olan 7 ailənin övladlarına məktəb ləvazimatlarının alınması üçün yardım da göstərilib.

Sədr bələdiyyə büdcəsinin formalaşmasından danışarkən bildirib ki, əsas mənbə torpaq və əmlak vergisindən, həmçinin bələdiyyə torpaqlarının icarəyə verilməsi və özəlləşdirilməsindən daxil olan vəsaitlərdir. Bu mənbələrdən ötən il bələdiyyə büdcəsinə 63 min 880 manat, cari ilin 9 ayında isə 69 min 255 manat vəsait daxil olub. “Vətəndaşlarımız öz bələdiyyəsinin inkişafında maraqlıdırlar, həyata keçirilən işlərə dəstək göstərirlər. Hələlik gündəlik, aylıq gəlir gətirəcək müəssisə yarada bilməmişik. Ancaq bu, gələcək panlarımızdan biridir. Elə bir müəssisə quraq ki, gəlirlərimizin artmasına, yeni iş yerlərinin açılmasına imkan yaratsın. Bu, ticarət mərkəzi, xidmət sahəsi, məsələn, avtomobil yuma məntəqəsi də ola bilər”, - deyə o vurğulayıb.

Həmsöhbətimiz bildirib ki, Vəndam bələdiyyəsi fəaliyyətini Qəbələ Rayon İcra Hakimiyyəti, eləcə də digər dövlət qurumları ilə sıx əməkdaşlıq şəraitində qurub. Rayon icra hakimiyyətinin başçısı Səbuhi Abdullayevin iştirakı ilə qəsəbə sakinləri ilə keçirilən səyyar qəbullar zamanı vətəndaşların müraciət və təklifləri diqqətlə dinlənilir, qaldırılan məsələlər nəzarətə götürülür. Qəsəbə bələdiyyəsi də vətəndaşları narahat edən məsələlərin həllində rayon icra hakimiyyətinə, dövlət orqanlarına imkanı daxilində dəstək olur, kömək edir. Çalışır ki, vətəndaşlar narazı qalmasınlar.

Bələdiyyə sədri ilə söhbət zamanı tez-tez mobil telefonuna zənglərin gəldiyinin şahidi olduq. Sakinlər müxtəlif məsələlərlə bağlı müraciət edirdilər. Asif Həşimov deyir ki, sakinlərin müraciətlərinə həssaslıqla yanaşmaq, onları narahat edən məsələlərin həllinə kömək etmək lazımdır. Əks təqdirdə seçicilərin bələdiyyəyə olan etibarı, inamı azalar.