Vətən Müharibəsi Qəhrəmanı: Xocalı milli kimliyimizin sınaq nöqtəsidir
Bakı, 25 fevral, AZƏRTAC
Bu gün qürur hissi milli yaddaşımızı yaşatmaq üçün bir araya toplaşmışıq. 34 il bundan əvvəl Azərbaycan tarixinin ən qanlı səhifələrindən biri yazıldı. Dinc insanlar Xocalıda amansızcasına qətlə yetirildilər. Xocalı faciəsi bütün bəşəriyyətə qarşı törədilmiş cinayət idi. Bu təkcə bir hərbi əməliyyat deyildi, Azərbaycan xalqının başına gətirilən, bilərəkdən törədilmiş soyqırımı idi.
AZƏRTAC xəbər verir ki, bunu İkinci Qarabağ müharibəsinin iştirakçısı, Vətən Müharibəsi Qəhrəmanı Zaur Hüseynov “Xocalı: Səhnələşən yaddaş” adlı tədbirdə çıxış edərkən deyib.
Zaur Hüseynov Xocalının Azərbaycan xalqının qan yaddaşı olduğunu bildirib: "Xocalı milli kimliyimizin sınaq nöqtəsidir. Biz illərlə Azərbaycanın xalqının başına gətirilən bəlaları xatırlayırdıq, unutmurduq. Müzəffər Ali Baş Komandanın dəmir iradəsi, sarsılmaz qətiyyəti ilə bizə verdiyi əmrlə təkcə torpaqlarımızı azad etmək üçün deyil, 30 illik ləkəni alnımızdan silmək üçün döyüş meydanına atıldıq. Biz Xocalıya ədalətin döyüş meydanında necə bərpa olunduğunu sübut etdik. 44 günlük Vətən müharibəsi göstərdi ki, Azərbaycan xalqı heç vaxt heç nəyi unutmur".
Bölmənin digər xəbərləri
