Vətən müharibəsinin iştirakçısı: Torpağı qanla, Vətəni isə sevgi ilə qoruyurlar VİDEO
Cəlilabad, 3 oktyabr, İlkin Adıyev, AZƏRTAC
44 günlük Vətən müharibəsi başlayanda mənim üçün qərar vermək çətin olmadı. O, gün xəbər yayılan kimi ürəyimdə bir səs dedi ki, sən bu savaşdan kənarda qala bilməzsən. Könüllü olaraq hərbi komissarlığa müraciət etdim və cəbhəyə yollandım. Mənim üçün ən böyük şərəf, ən böyük amal torpaqlarımızın azadlığı uğrunda vuruşmaq idi”.
AZƏRTAC-ın bölgə müxbiri xəbər verir ki, bu sözləri Vətən müharibəsinin iştirakçısı Toğrul Rizvanlı bildirib. O, müharibə başlayan ilk gündən cəbhəyə könüllü yollanıb, tapdaq altında olan torpaqlarımızın erməni işğalından azad olunmasında xüsusi şücaət göstərib.
Toğrul müharibəyə yola düşməzdən əvvəl anasından halallıq alıb. Anasının xeyir-duası cəbhəyə yollanarkən onun üçün ən böyük mənəvi dayaq olub: “Müharibəyə getmək qərarı verəndə anam mənə dedi ki, “haqqım sənə halal olsun”. Mən də onun xeyir-duasını alaraq döyüşlərə yollandım. Anamın duaları mənim üçün böyük güc mənbəyi idi”.
“İlk döyüşümüz hələ də gözümün önündədir. Sanki dünən baş verib... Qarşımızda düşmən mövqeləri idi... Hamımız bilirdik ki, bu yol şəhidlikdən, qəhrəmanlıqdan keçir. Qorxmadıq, çünki döyüşdə qalib gəlmək üçün güclü, mərd və iradəli olmalısan. Mənim bölüyümdə elə oğullar var idi ki, düşmənə qan udururdu. Onlar döyüşlərdə şəhid oldular, amma bir addım belə geri çəkilmədilər. İşğal altında olan torpaqlarımızı onların canı və qanı bahasına azad etdik. Döyüşlərin ən çətin anlarından biri Qubadlı istiqamətində, Qanlı Təpə deyilən ərazidə oldu. Gecə boyu mövqedə qalmışdıq, soyuqdan əllərimiz donurdu, amma qəlbimiz isti idi, çünki bilirdik ki, sabah o torpaqlarda Azərbaycan Bayrağı dalğalanacaq. Hər dəfə silahımı əlimə alanda gözümün önünə öz elim, obam, ailəm, şəhidlərin ruhu gəlirdi. Mənim üçün döyüş meydanında dayanmaq yalnız hərbi borc deyildi, həm də vicdan borcu idi”, – deyən həmsöhbətim o günləri yada salır.
Vətən müharibəsindən sonra Toğrul Rizvanlıya kapitan rütbəsi verilib. O, bunu böyük fəxrlə söyləsə də, qəhrəmanlığın rütbə ilə ölçülmədiyini vurğulayıb: “Müharibədən sonra mənə kapitan rütbəsi verildi. Bu, mənim üçün fəxrdir. Allah şəhidlərimizə rəhmət eləsin, qazilərimizə cansağlığı versin. Şəhidlərimiz ən yüksək zirvəyə ucaldılar”.
Toğrul Rizvanlı hazırda Cəlilabad şəhərində yerləşən Vətən Müharibəsi Qəhrəmanı Rəşad Abdullayev adına 2 saylı tam orta məktəbdə hərbi rəhbər kimi fəaliyyət göstərir.
O, məktəblilərlə iş apararaq onlara vətənpərvərlik dəyərlərini aşılayır və daim milli ruhda tərbiyə olunmalarına diqqət yetirir: “Hazırda hərbi rəhbər kimi gənclərlə çalışıram. Mənim əsas məqsədim onlara Vətən sevgisi aşılamaq, igid olmağı öyrətməkdir. Şagirdlərə hər zaman deyirəm ki, torpağı qanla qoruyurlar, Vətəni yaşadan isə sevgidir”, – deyə Toğrul əlavə edib.
Onun sözlərinə görə, gənc nəslin milli ruhda böyüməsi Vətənin gələcəyi üçün ən mühüm təminatdır.
“Mənim ən böyük qürurum odur ki, Vətən müharibəsində iştirak etdim, torpaqlarımızın azadlığı uğrunda vuruşdum. Hər dəfə məktəbin həyətində şagirdlərə baxanda içimdən bu sözlər keçir: bu gənclər bizim davamçılarımız olacaq, Vətəni daim qoruyacaqlar. Onlar Vətənimizin keşikçiləridir”.
Qeyd edək ki, Toğrul Rizvanlı "Cəbrayılın azad olunmasına görə" , "Qubadlının azad olunmasına görə" və "Vətən müharibəsi iştirakçısı" medalları ilə təltif edilib.
Bölmənin digər xəbərləri
