“VƏTƏN” TƏLƏBƏ TƏŞKİLATI ERMƏNİLƏRİN TÖRƏTDİKLƏRİ VƏHŞİLİKƏR BARƏDƏ MİSİRDƏ GENİŞ MƏLUMATLAR YAYMAĞA ÇALIŞIR
Bakı, 11 fevral (AZƏRTAC). Misirdə azərbaycanlıların az olmasına baxmayaraq, son illər burada ölkəmizin təbliği işi sürətlənmişdir. Bu işdə Misirdə fəaliyyət göstərən “Vətən” tələbə təşkilatı mühüm rol oynayır.
Təşkilatın sədri Azər Hüseynov bildirmişdir ki, təhsil aldıqları universitetlərdə Azərbaycan günləri keçirilir. Tədbirlərdə Azərbaycan, o cümlədən işğal olunmuş ərazilərimiz haqqında məlumat verilir, broşürlər paylanır. Çalışırıq ki, təhsil aldığımız universitetlərdə ermənilərin törətdikləri vəhşiliklər barədə geniş məlumatlar verək.
Milli mədəniyyətimizin təbliği də mühüm vəzifələrdəndir. Tədbirlərdə Azərbaycan musiqisi ifa olunur, milli rəqslərimiz nümayiş etdirilir. Bütün bu işlərdə Azərbaycanın Misirdəki səfirliyi yaxından kömək göstərir.
Qeyd edək ki, “Vətən” tələbə təşkilatı ərəb dilində “Azərbaycan” adlı qəzet də nəşr edir. Qəzetin nüsxələri Misirin rəsmi, qeyri-dövlət və ictimai müəssisələrinə, universitetlərə və kitabxanalara, həmçinin Azərbaycanın digər ərəb ölkələrindəki səfirliklərinə göndərilir.
Bölmənin digər xəbərləri
