Vidadi Qafarov: Tənqid obyektiv və xoşniyyətli yanaşma ilə sənətkarı inkişaf etdirən peşəkar baxışdır
Bakı, 27 noyabr, AZƏRTAC
Rejissor, aktyor, dramaturq, rəssam, bəstəkar və ən əsası tamaşaçının birgə iştirakı tamaşanın yaranmasını şərtləndirir. Bu prosesin sağlam və dinamik inkişafı üçün tənqid mühüm əhəmiyyət daşıyır.
Bunu AZƏRTAC-a açıqlamasında Azərbaycan Milli Elmlər Akademiyasının Memarlıq və İncəsənət İnstitutunun Teatr, kino və televiziya şöbəsinin müdiri, sənətşünaslıq üzrə fəlsəfə doktoru, dosent Vidadi Qafarov deyib.
Onun sözlərinə görə, tarixi təcrübə tənqidin teatrın inkişafını təmin edən əsas mexanizmlərdən biri olduğunu göstərir.
“Müasir dövrdə rejissorlar tənqidə daha həssas yanaşsalar da, yazılan hər rəy yaradıcılıq prosesinin diqqət mərkəzində qalır. Tənqid obyektiv və xoşniyyətli yanaşma ilə sənətkarı inkişaf etdirən peşəkar baxışdır. Teatr tənqidçiləri həm bu günün sənət prosesini sənədləşdirir, həm də gələcək nəsillər üçün teatr tarixini formalaşdırırlar. 50–100 il sonra bugünkü teatr mühiti onların resenziyaları, portret yazıları və araşdırmaları əsasında dəyərləndiriləcək”,- deyə alim əlavə edib.
Azərbaycanda tənqid sahəsində fəaliyyət göstərən mütəxəssis və gənc tədqiqatçıların olduğunu diqqətə çatdıran V.Qafarov deyib: “Tənqidçilərə hörmət və dəstəyin göstərilməsi teatrın sağlam inkişafının vacib şərtlərindən biridir. Çünki güclü teatr mühiti yalnız açıq dialoq, peşəkar münasibət və fikir mübadiləsi əsasında formalaşır”.
Bölmənin digər xəbərləri
