Vüsal Abdullazadə: Əminik ki, idmançılarımız Avropa çempionatında Azərbaycanı layiqincə təmsil edəcəklər
Bakı, 2 oktyabr, AZƏRTAC
Azərbaycan fudokançıları ilk dəfə Avropa çempionatında iştirak edəcəklər. Yarışda 4 idmançımız mübarizə aparacaq. Əminik ki, idmançılarımız qitə çempionatında Azərbaycanı layiqincə təmsil edəcəklər.
Bu sözləri AZƏRTAC-a müsahibəsində Dünya Fudokan Federasiyasının Azərbaycan üzrə rəsmi təmsilçisi, eləcə də səlahiyyətli nümayəndəsi Vüsal Abdullazadə bildirib.
O qeyd edib ki, onun dəvəti ilə Bakıya səfərə gələn Dünya Fudokan Federasiyasının prezidentinin iştirakı ilə beynəlxalq seminar keçirilib: “Bir ay bundan əvvəl dəvətimlə Bakıya gələn Dünya Fudokan Federasiyasının prezidenti, 10-cu dan qara kəmər sahibi İlya Yorqanın iştirakı ilə beynəlxalq seminar keçirilib. Beynəlxalq seminarın təşkilində əsas məqsəd fudokanın Azərbaycanda inkişaf etdirilməsi, bu idman növü üzrə Avropa, dünya çempionatlarında mübarizə aparacaq potensiallı idmançılar yetişdirməkdir. Artıq ölkəmizdə fudokanın inkişafı istiqamətində bir sıra işlər görülüb. Fudokan üzrə növbəti dünya çempionatının Azərbaycanda təşkili planlaşdırılır”.
Qeyd edək ki, fudokan üzrə 25-ci Avropa çempionatı oktyabrın 2-6-da Polşanın Katovis şəhərində təşkil ediləcək. Avropa çempionatında 30-dan çox ölkənin idmançısı mübarizə aparacaq.
Bölmənin digər xəbərləri
