Vyetnamda “Azərbaycanı kəşf et” sərgisi açılıb
Bakı, 12 aprel, AZƏRTAC
Azərbaycan Xalq Cümhuriyyətinin (AXC) 100-cü ildönümü ilə əlaqədar Vyetnamın Sosial və Humanitar Elmlər Universitetində “Azərbaycanı kəşf et” adlı sərgi açılıb.
Ölkəmizin Vyetnamdakı səfirliyindən AZƏRTAC-a bildiriblər ki, universitetin professor-müəllim heyətinin və tələbələrin iştirakı ilə keçirilən açılış mərasimində səfir Anar İmanov müsəlman Şərqində ilk dünyəvi, demokratik dövlət olan AXC-nin dövlətçilik quruculuğunda həyata keçirdiyi işlər haqqında dolğun məlumat verib. Bildirib ki, Xalq Cümhuriyyəti cəmi 23 ay fəaliyyət göstərməsinə baxmayaraq, müstəqil dövlətçiliyimizin əsaslarının yaradılması və gələcək inkişaf yolunun müəyyənləşdirilməsi baxımından böyük əhəmiyyət kəsb edib.
Səfir Anar İmanov müstəqil Azərbaycan Respublikasının AXC-nin varisi olduğunu bildirərək ölkəmizin, Xalq Cümhuriyyətinin təməlini qoyduğu bütün demokratik ənənələrə sadiq qalaraq, həmin dəyərləri hazırkı dövrdə də yaşatdığını qeyd edib. Diplomat müstəqilliyin bərpasından sonra müasir Azərbaycan dövlətinin ümummilli lider Heydər Əliyevin və ulu öndərin layiqli davamçısı Prezident İlham Əliyevin rəhbərliyi sayəsində Cənubi Qafqaz regionunda lider dövlətə çevrildiyini bildirib.
Anar İmanov Vyetnamın Azərbaycanın Cənubi-Şərqi Asiya bölgəsində əsas tərəfdaş ölkələrindən biri olduğunu bildirərək, son illər münasibətlərin bütün spektri üzrə, o cümlədən təhsil sahəsində qarşılıqlı faydalı əməkdaşlığın sürətlə genişləndiyini söyləyib. Dövlət başçılarının qarşılıqlı səfərlərinin tarixi köklərə əsaslanan dostluq əlaqələrinin yüksək səviyyədə olmasının bariz təzahürü olduğunu deyib. O, iki ölkə arasında xalq diplomatiyasının gücləndirilməsinin zəruriliyini vurğulayaraq, Azərbaycan və Vyetnam təhsil ocaqları arasında birbaşa əlaqələrin qurulmasının və qarşılıqlı səfərlərin sayının artırılmasının əhəmiyyətini qeyd edib.
Vyetnam Sosial və Humanitar Elmlər Universitetinin rektoru Fam Quanq Min son illər Azərbaycan ilə Vyetnam arasında əlaqələrin inkişaf templərini yüksək dəyərləndirib. Qeyd olunub ki, qazandıqları biliklər sayəsində Azərbaycan təhsil ocaqlarının minlərlə vyetnamlı məzunu müharibədən sonra ölkənin bərpasında və hazırkı inkişafında uğurla iştirak edirlər.
Fam Quanq Min rəhbərlik etdiyi universitetin Azərbaycan kimi dost ölkə ilə birbaşa əlaqələrin qurulmasına böyük önəm verdiyini xüsusi vurğulayıb. O, zəngin tarixi keçmişə əsaslanaraq, hər iki ölkənin gənc nəsilləri arasında da sıx əlaqələrin yaradılmasının zəruriliyini bildirib.
Sərgidə Azərbaycan Xalq Cümhuriyyəti və onun varisi olan müasir Azərbaycan Respublikası haqqında yazılı məlumat, həmçinin foto və video materiallar nümayiş etdirilir.
Sərgi bir həftə davam edəcək.
Bölmənin digər xəbərləri
