WUF13: qlobal urban dialoqu və ictimai birliklərin artan rolu – ŞƏRH
Bakı, 4 fevral, AZƏRTAC
Müasir dünyada şəhərlər iqtisadi inkişafın, sosial inteqrasiyanın və ekoloji tarazlığın əsas mərkəzlərinə çevrilib. Məhz bu kontekstdə BMT-nin Məskunlaşma Proqramı (UN-Habitat) tərəfindən təşkil olunan Ümumdünya Şəhərsalma Forumu (WUF) qlobal şəhərsalma gündəliyinin formalaşmasında mühüm rol oynayır. WUF13-ün Azərbaycanda keçirilməsi isə əlbəttə ki, təsadüfi deyil. Azərbaycanda hazırda müşahidə etdiyimiz “Böyük Qayıdış” prosesi şəhərsalma ilə miqrasiya siyasətinin bir-birindən ayrılmaz olduğunu açıq şəkildə nümayiş etdirir. WUF13 bu uğurların dünya ictimaiyyətinə təqdim edilməsi üçün unikal platforma rolunu oynayacaq. WUF13-ün Azərbaycanda təşkili ölkənin təkcə ev sahibi deyil, həm də təcrübə paylaşan tərəf kimi çıxış etdiyini göstərəcək.
Bu fikirləri AZƏRTAC-a açıqlamasında “Vətəndaşların Sosial Rifahı Naminə” İctimai Birliyinin sədr müavini Nədimə Rəhimli deyib.
Onun sözlərinə görə, Forumun Azərbaycanda təşkili həm də ölkənin Şərq və Qərb arasında oynadığı körpü rolunu gücləndirəcək, urban problemlərin regional deyil, qlobal baxışla müzakirə edilməsinə şərait yaratmış olacaq.
“WUF13-ün builki mövzusunun “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” olması əvvəlki forumlardan əsaslı şəkildə fərqlənərək diqqəti yalnız şəhərlərin fiziki inkişafına deyil, insan mərkəzli, dayanıqlı və böhranlara davamlı şəhər modellərinə yönəldir. Bu yanaşma müasir dövrün sosial, ekoloji və geosiyasi reallıqlarından irəli gəlir. Bu isə sosial ədalət, inklüzivlik və bərabər imkanlar anlayışını ön plana çıxarır. Belə məsələlərin gündəmə gətirilməsində isə ictimai birliklərin rolu danılmazdır. Məhz QHT-lər yerli icmaların problemlərini, vətəndaşların real ehtiyaclarının yerli səviyyədə həllinə dair addımlar atır və beynəlxalq tribunalara çıxara bilirlər”, - deyə sədr müavini qeyd edib.
“Əlbəttə ki, belə nüfuzlu tədbirlərin əhəmiyyəti təkcə keçirildiyi günlərlə məhdudlaşmır. WUF13-dən sonra formalaşan əməkdaşlıqlar, ideyalar və təşəbbüslər Azərbaycanın urban siyasətinə uzunmüddətli təsir göstərəcək. Dövlət qurumları, ictimai birliklər və beynəlxalq tərəfdaşlar arasında yaranan sinerji ölkənin dayanıqlı şəhər modelinə keçidini sürətləndirəcək. Nəticə etibarilə, WUF 13-ün Azərbaycanda keçirilməsi təkcə beynəlxalq tədbir deyil, həm də ölkənin gələcək şəhər baxışının dünyaya təqdimatıdır. Bu prosesdə ictimai birliklərin fəallığı isə şəhərlərin həqiqətən də insanlar üçün qurulmasının əsas təminatlarından biridir. Forumun Azərbaycanda keçirilməsi həm də mühüm siyasi və sosial mesajdır. Bu, regionda sülh, bərpa və inkişafın mümkünlüyünü göstərir”- deyə o vurğulayıb.
Bölmənin digər xəbərləri
