XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Yanvarın 23-də Azərbaycan Respublikasının xarici işlər naziri Vilayət Quliyev Azərbaycanda akkreditə olunmuş İsveç Krallığı səfirliyinin müşaviri Anders Elofsonu qəbul etmişdir.
Görüş zamanı Vilayət Quliyev və Anders Elofson İsveç ilə Azərbaycan arasındakı münasibətlərin möhkəmlənməsinə dair ətraflı fikir mübadiləsi aparmışlar.
Qonağın xahişi ilə nazir Vilayət Quliyev Azərbaycanda demokratiyanın inkişafı, insan haqlarının müdafiəsi, Avropa Şurasına qəbul edildikdən sonra bu beynəlxalq təşkilat qarşısında öhdəliklərin yerinə yetirilməsi sahəsində görülən işlər, Azərbaycanın Avropa Şurasının konvensiyalarına qoşulması və demokratik islahatların aparılması barədə ətraflı məlumat vermişdir.
Daha sonra ölkəmizin xarici siyasət idarəsinin başçısı V.Quliyev Ermənistan-Azərbaycan, Dağlıq Qarabağ münaqişəsinin həlli istiqamətində aparılan işlər, ATƏT-in Minsk qrupunun bu istiqamətdə fəaliyyəti və qaçqınların ağır vəziyyəti barədə də qonağa ətraflı məlumat vermiş, həmçinin münaqişənin beynəlxalq hüququn prinsip və normaları əsasında tezliklə aradan qaldırılması üçün beynəlxalq birliyin səylərinin zəruriliyini qeyd etmişdir.
Öz növbəsində Anders Elofson Ermənistan-Azərbaycan, Dağliq Qarabağ münaqişəsinin tezliklə ədalətli sülh prinsipləri əsasında öz həllini tapacağına ümidvar olduğunu bildirmiş və Azərbaycanın demokratik dəyərlərə inteqrasiyasını yüksək qiymətləndirmişdir.
Görüşdə qarşılıqlı maraq doğuran bir sıra məsələlər də müzakirə olunmuşdur.
Bölmənin digər xəbərləri
