XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Oktyabrin 1-də Azərbaycan Respublikasının xarici işlər nazirinin müavini Xələf Xələfov Azərbaycanda səfərdə olan Fransa Respublikasının xarici işlər üzrə dövlət katibi Reno Müzelyeni qəbul etmişdir.
Görüş zamanı Xələf Xələfov ölkələrimiz arasındakı münasibətləri müsbət dəyərləndirərək, bu səfərin qarşılıqlı əməkdaşlığın inkişafı üçün faydalı olacağına əmin olduğunu bildirmişdir. O, son illərdə ölkələrimiz arasında iqtisadi sahədə ikitərəfli əməkdaşlığın genişlənməsi istiqamətində bir sıra işlərin aparıldığını qeyd etmiş, bu əməkdaşlığın bir çox sahələrdə də, o cümlədən kiçik və orta sahibkarlıq sektorunda, elm, təhsil, mədəniyyət və səhiyyə sahələrində də inkişaf etdirilməsinin zəruriliyini vurğulamışdır. Xələf Xələfov həmçinin parlamentlərarası dostluq qruplarının fəaliyyətini yüksək qiymətləndirmiş və beynəlxalq təşkilatlar çərçivəsində ölkələrimiz arasında səmərəli əməkdaşlığın davam etdirilməsinə tərəfdar olduğunu bildirmişdir.
Sonra Xələf Xələfov Ermənistan-Azərbaycan, Dağlıq Qarabağ münaqişəsinə toxunaraq, Azərbaycan tərəfinin bu münaqişənin sülh yolu ilə həll edilməsinə tərəfdar olduğunu qeyd etmiş və Fransanın ATƏT-in Minsk Qrupunun həmsədri kimi öz səylərini artıracağına ümidvar olduğunu söyləmişdir.
Öz növbəsində Fransanın xarici işlər üzrə dövlət katibi Reno Müzelye Fransa ilə Azərbaycan arasındakı münasibətlərin daha da möhkəmlənməsinə və əlaqələrin bir çox sahələrdə genişlənməsinə tərəfdar olduğunu vurğulamışdır. Qonaq Ermənistan-Azərbaycan, Dağlıq Qarabağ münaqişəsinin tezliklə ədalətli həllinə ümidvar olduğunu bildirmişdir. Reno Müzelye Fransanın Azərbaycanla siyasi, iqtisadi, diplomatik və s. sahələrdə əməkdaşlığın inkişafına xüsusi maraq göstərdiyini nəzərə çarpdırmış, Fransa şirkətlərinin Azərbaycanda fəaliyyətindən məmnun qaldıqlarını söyləmişdir.
Reno Müzelye Azərbaycanın Avro-Atlantik strukturlarına inteqrasiyasının Fransa tərəfindən dəstəkləndiyini qeyd edərək, bu istiqamətdə səylərin davam etdiriləcəyini söyləmişdir.
Görüşdə qarşılıqlı maraq doğuran bir sıra məsələlər də müzakirə edilmişdir.
XARİCİ İŞLƏR NAZİRLİYİNİN ƏMƏKDAŞLARI MİSİRDƏ KEÇİRİLƏN KURSLARDA İŞTİRAK ETMİŞLƏR
Azərbaycan Respublikası Xarici İşlər Nazirliyinin bir qrup əməkdaşı Misirin MDB ölkələri və yeni yaranmış müsəlman dövlətləri ilə Texniki Əməkdaşlıq üzrə Fondu tərəfindən təşkil edilmiş diplomatik kurslarda iştirak etmişlər. Kurslar Misir Xarici İşlər Nazirliyi yanında fəaliyyət göstərən Diplomatik Tədqiqat İnstitutunda keçirilmişdir.
Diplomatik kurslar zamanı Misir Xarici İşlər Nazirliyinin təcrübəli əməkdaşları və Misir Universitetlərinin professorları Protokol qaydaları, Danışıqların aparılması, Misir-Azərbaycan əlaqələri, Ümumdünya Ticarət Təşkilatı, Beynəlxalq hüquq, Böhranlar, Beynəlxalq siyasi münasibətlər, Dünyanın iqtisadi inkişafı, Misirin xarici siyasəti və sair mövzularda mühazirələr oxumuşlar.
Azərbaycan Xarici İşlər Nazirliyinin əməkdaşları mühazirələr və görüşlər zamanı Misirin görkəmli ictimai-siyasi və elm xadimləri ilə fikir mübadilələrində fəal iştirak etmiş, respublikamızın daxili və xarici siyasəti haqqında dolğun və ətraflı izahatlar vermişlər.
XİN-in əməkdaşları kurslar zamanı Misirin Xarici İşlər Nazirliyi və Ərəb Dövlətləri Liqasında olmuş, Nazirliyin və Liqanın yaranma tarixi, fəaliyyəti və strukturu haqqında məlumatlarla tanış olmuşlar. Qrupun rəhbəri Cavanşir Vəkilov Misir xarici işlər nazirinin müavini M.Zayed tərəfindən qəbul edilmiş və görüş zamanı Misir-Azərbaycan münasibətləri haqqında söhbət aparılmışdır.
Ölkəmizin nümayəndələri həmçinin, bu müddət ərzində Azərbaycan Respublikasının Qahirədəki səfirliyi ilə sıx əlaqə saxlamış, səfirliyi ziyarət etmişlər.
Misir Xarici İşlər Nazirliyi yanında Diplomatik Tədqiqat İnstiutunun rektoru Məhəmməd Rifah Əttəhtəvi tərəfindən Azərbaycan Respublikası XİN-in əməkdaşlarına kurslarda iştirak haqqında diplomlar təqdim olunmuşdur. Azərbaycan diplomatları tərəfindən Ermənistanın Azərbaycana təcavüzü və Azərbaycan Respublikasında ictimai-siyasi vəziyyətlə bağlı Misir tərəfinə dolğun və ətraflı izahatlar verilmiş, təcavüz ilə əlaqədar çoxsaylı informasiya materialı paylanılmışdır.
Bölmənin digər xəbərləri
