XARİCİ ÖLKƏLƏRDƏ YAŞAYAN AZƏRBAYCANLILARIN TƏHSİL PROBLEMLƏRİNİN HƏLLİNƏ KÖMƏK GÖSTƏRİLƏCƏKDİR
AZƏRTAC xəbər verir ki, bu barədə təhsil naziri Misir Mərdanovla Avropa Azərbaycanlıları Konqresinin (AAK) prezidenti Natiq Ağamirovun görüşündə bildirilmişdir.
N.Ağamirov AAK-ın Fəaliyyət Proqramı barədə məlumat vermiş, Avropa ölkələrində yaşayan azərbaycanlıların milli mənəvi dəyərlərə sədaqət ruhunda tərbiyə olunması, onların ana dilini, xalqımızın tarixini, ölkəmizin coğrafiyasını öyrənmələri ilə bağlı bir sıra mühüm müddəaların sənəddə əksini tapdığını diqqətə çatdırmışdır.
O demişdir ki, xarici ölkələrdə təhsil alan azərbaycanlı gənclərin diaspor quruculuğu işinə cəlb olunması, “Həftə sonu” məktəblərinin maddi-texniki bazasının möhkəmləndirilməsi istiqamətində ciddi iş aparılır.
N.Ağamirov “Həftə sonu” məktəblərində çalışan müəllimlərin pedaqoji ixtisaslarının artırılmasının əhəmiyyətindən danışmışdır.
Misir Mərdanov xaricdəki soydaşlarımızın problemlərinin daim diqqət mərkəzində olduğunu, Azərbaycandan müəllimlərin xaricdəki “Həftə sonu” məktəblərinə ezam edilməsinin mümkünlüyünü diqqətə çatdırmışdır. Nazir Avropada əla təhsil alan tələbələrin Prezident təqaüdünə təqdim edilməsinin, Avropada orta ümumtəhsil məktəblərini müvəffəqiyyətlə bitirmiş azərbaycanlı məzunların Avropa və MDB ölkələrinin nüfuzlu ali məktəblərinə göndərilməsinin zəruriliyini vurğulamışdır.
Görüşdə Gürcüstandakı Azərbaycan məktəblərində gürcü dilinin tədrisi məqsədi ilə pedaqoji kadrların hazırlanması məsələsi də müzakirə olunmuşdur. M.Mərdanov bu problemin həlli üçün müvafiq tədbirlərin görüləcəyini bildirmişdir.
Nazir Avropada təhsil alan azərbaycanlı tələbələrin forumunun keçirilməsi təşəbbüsünü də yüksək qiymətləndirmiş və bu tədbirin təşkilinə dəstək veriləcəyini demişdir.
Bölmənin digər xəbərləri
