Xəbərdarlıq: Bəzi yerlərdə intensiv yağış, yüksək dağlıq ərazilərdə isə qar yağacaq
Bakı, 20 aprel, AZƏRTAC
Aprelin 21-də Bakıda və Abşeron yarımadasında gündüz şimal-qərb küləyinin sürətinin saniyədə 15-20 metr olacağı, axşama doğru arabir 23 metrədək güclənəcəyi gözlənilir.
Ekologiya və Təbii Sərvətlər Nazirliyinin Milli Hidrometeorologiya Xidmətindən AZƏRTAC-a verilən məlumata görə, aprelin 21-i əvvəlcə şimal və qərb rayonlarında, gün ərzində isə digər ərazilərdə havanın arabir yağıntılı olacağı gözlənilir. Ayrı-ayrı yerlərdə intensiv olacağı, şimşək çaxacağı, dolu düşəcəyi, yüksək dağlıq ərazilərdə qar yağacağı ehtimalı var. Aprelin 22-si və 23-də isə gündüz saatlarında dağlıq və dağətəyi rayonlarda havanın yağıntılı olacağı proqnozlaşdırılır. Qərb küləyi əsəcək, sürəti saniyədə 15-20 metr olacaq, aprelin 21-də bəzi yerlərdə arabir 23-28 metrədək güclənəcək.
Aprelin 24-ü axşam qərb rayonlarından başlayaraq 25-i axşamadək yenidən hava şəraitinin yağıntılı olacağı gözlənilir. Ayrı-ayrı yerlərdə intensiv olacağı, şimşək çaxacağı, dolu düşəcəyi, yüksək dağlıq ərazilərdə qar yağacağı ehtimal edilir.
Çaylarda sululuğun artacağı bildirilir.
Bölmənin digər xəbərləri
