Xəzər dənizinə axıdılan təmizlənmiş suyun həcmi artırılacaq
Bakı, 15 sentyabr, AZƏRTAC
Asiya İnkişaf Bankı (AİB) Azərbaycan Dövlət Su Ehtiyatları Agentliyi (ADSEA) ilə əməkdaşlıq çərçivəsində Hövsan Təmizləyici Qurğular Stansiyasında həyata keçiriləcək “Çirkab Sularının Təmizlənməsi və Təkrar İstifadəsi” layihəsi üzrə tranzaksiya məsləhət xidmətləri (TAS) göstərəcək.
AİB-dən AZƏRTAC-a bildirilib ki, layihə Xəzər dənizinə axıdılan təmizlənmiş suyun həcmini artırmaqla sanitariya şəraitini yaxşılaşdıracaq və təkrar emal edilmiş sudan istifadə üçün geniş imkanlar yaradacaq. Bu, AİB-in Azərbaycandakı ilk TAS razılaşmasıdır.
“AİB-in Hövsan layihəsinə göstərəcəyi dəstək Azərbaycanda su idarəçiliyinin yaxşılaşdırılmasına töhfə verməklə yanaşı, dövlət-özəl tərəfdaşlığı ilə baş tutan layihələrin innovativ və iqlimə davamlı infrastrukturlar ərsəyə gətirməsinə nümunə olacaq”, – deyə AİB-in Bazarların İnkişafı və Dövlət–Özəl Tərəfdaşlıq Ofisinin rəhbəri Takeo Koike bildirib.
“Bu layihə su ehtiyatlarının qorunması, Bakıda sanitariya xidmətlərinin yaxşılaşdırılmasına dair hökumətimizin prioritetlərini əks etdirir. Eyni zamanda “Su ehtiyatlarından səmərəli istifadəyə dair Milli Strategiya”nın bir hissəsi olan təkrar emal olunmuş sudan istifadə üçün geniş imkan yaradır”, – deyə Azərbaycan Dövlət Su Ehtiyatları Agentliyinin sədri Zaur Mikayılov qeyd edib.
Layihə gündəlik 640 min kubmetr tutuma malik Hövsan Təmizləyici Qurğular Stansiyasının bərpasını, istismarını və saxlanılmasını əhatə edəcək. Layihə çərçivəsində, həmçinin çirkab sularının daha yaxşı təmizlənərək Abşeron ərazisindəki kənd təsərrüfatında istifadə oluna bilməsi üçün stansiyanın müasir avadanlıqlarla təchiz olunması nəzərdə tutulur. Layihənin dizayn et, qur, maliyyələşdir, idarə et və saxla modeli üzrə həyata keçirilməsi planlaşdırılır.
Bakıdan 15 kilometr şərqdə yerləşən Hövsan Təmizləyici Qurğular Stansiyası paytaxtın ən böyük çirkab su təmizləyici stansiyasıdır. Sovet dövründə inşa edilmiş stansiya hazırda yalnız qismən təmizlənmiş suları Xəzər dənizinə axıdır ki, bu da sahilboyu ekoloji çirklənməyə səbəb olur. Azərbaycan hökuməti çirkab su təmizləyici qurğularının yenilənməsini 2024-cü ildə qəbul olunan “Su ehtiyatlarından səmərəli istifadəyə dair Milli Strategiya”da prioritet sahələrdən biri elan edib.
AİB-in tranzaksiya məsləhət xidməti layihənin hazırlanması, bazarın araşdırılması, strukturlaşdırma və tender proseslərinin həyata keçirilməsini əhatə edəcək. Məqsəd layihənin şəffaflığı, maliyyə cəlbediciliyi və ən yaxşı beynəlxalq təcrübələrə uyğunluğunu təmin etməkdir. Layihə, həmçinin gender bərabərliyinin təşviqini, ekoloji və sosial təminatlar üzrə beynəlxalq standartların inteqrasiyasını nəzərdə tutur.
Bu təşəbbüs “Azərbaycan 2030: sosial-iqtisadi inkişafa dair Milli Prioritetlər” strategiyasını dəstəkləyir və 2025–2029-cu illəri əhatə edən AİB-in yeni təsdiq olunmuş Ölkə üzrə Tərəfdaşlıq Strategiyası (ÖTS) ilə uyğunluq təşkil edir. ÖTS iqlimə davamlılıq və özəl sektorun inkişafı kimi əsas istiqamətləri vurğulayır.
Hövsan layihəsi dövlət layihələrinə maliyyə dəstəyi ilə yanaşı dövlət-özəl tərəfdaşlıq modelini təqdim edir. Bu layihə, Azərbaycanın su və şəhər infrastrukturuna AİB-in indiyə qədər dövlət sektoru üzrə ayırdığı 557 milyon dollar həcmində maliyyələşdirmənin davamıdır, həmçinin mövcud ÖTS-in icrası dövründə bu sektora göstərilməsi planlaşdırılan dəstəyin əsasını təşkil edir.
Azərbaycan 1999-cu ildən bəri AİB-in üzvüdür və bu dövr ərzində bank ölkədə infrastrukturun yaxşılaşdırılması, ictimai xidmətlərin təkmilləşdirilməsi, habelə özəl sektorun inkişafının dəstəklənməsi məqsədilə 5 milyard dollardan çox vəsait ayırıb.
AİB Asiya və Sakit Okean regionunda dayanıqlı, inklüziv və davamlı inkişafı dəstəkləyən aparıcı çoxtərəfli inkişaf bankıdır. AİB üzv ölkələr və tərəfdaşları ilə birlikdə mürəkkəb çağırışları həll edərkən, insanların həyatlarını yaxşılaşdırmaq, keyfiyyətli infrastruktur qurmaq və planetimizi qorumaq üçün innovativ maliyyə alətlərindən istifadə edir və strateji əməkdaşlıqlardan yararlanır. AİB 1966-cı ildə yaradılıb, 50-si regiondan olmaqla bankın 69 üzvü onun səhmdarlarıdır.
Bölmənin digər xəbərləri
