XƏZƏR DƏNİZİNİN AZƏRBAYCANA MƏNSUB HİSSƏSİNDƏ BİRGƏ XİLASETMƏ İŞLƏRİNİN TƏŞKİLİNƏ DAİR TAKTİKİ TƏLİM KEÇİRİLMİŞDİR
İyunun 28-də Dövlət Sərhəd Xidməti aviasiya dəstəsinin texniki istismar hissəsinin açılışından sonra təlim davam etdirilmişdir.
Təlimə Dövlət Sərhəd Xidmətinin sahil mühafizəsi və çevik hərəkət qüvvələri, sərhəd gözətçi gəmiləri və əlahiddə aviasiya dəstələri, “Lənkəran”, “Xudat”, “Şəmkir” sərhəd dəstələri və əlahiddə rabitə taburu, Fövqəladə Hallar Nazirliyinin yanğınsöndürmə qüvvələri, Xüsusi Dövlət Mühafizə Xidmətinin İxrac Neft-Qaz Boru Kəmərləri Mühafizə İdarəsinin qüvvələri və Müdafiə Nazirliyinin Hərbi Dəniz Qüvvələrinin gəmi divizionu cəlb edilmişlər.
Təlimin keçirilməsindən əsas məqsəd Xəzər dənizində Azərbaycan Respublikasının maraqlarının qorunması, Dövlət Sərhəd Xidmətinin hissə və bölmələrinin, Xüsusi Dövlət Mühafizə Xidmətinin, Fövqəladə Hallar Nazirliyinin yanğınsöndürmə və Müdafiə Nazirliyinin Hərbi Dəniz qüvvələrinin birgə döyüş hazırlığının yoxlanılması, şərait gərginləşdikdə xidməti-döyüş tapşırıqlarını yerinə yetirərkən birləşmə, hissə və bölmələrin döyüş və hərəkət nizamının təkmilləşdirilməsi, təxribat-kəşfiyyat qrupunun axtarışını apararkən və zərərsizləşdirərkən hissə və bölmələrin komandirlərinə dövlət sərhədinin mühafizəsinin təşkilində və tabelikdə olan müvafiq qurumların idarə edilməsində təcrübənin öyrədilməsi, bu tapşırıqların bacarıqla yerinə yetirilməsi üçün şəxsi heyətin peşəkarlığının artırılması, hərbi qulluqçuların səhra bacarıqlarının və mənəvi-psixoloji hazırlıqlarının yüksəldilməsindən ibarətdir.
Taktiki təlim 3 mərhələdə keçirilmişdir. Birinci mərhələdə “xüsusi obyektdə” terror aksiyası keçirmək istəyən terror-təxribat qrupu zərərsizləşdirilmişdir. Bu zaman AN-2 təyyarələrindən istifadə etməklə sahilboyu ərazidə havadan müşahidələr aparılmış, “xüsusi obyekt” minalardan zərərsizləşdirilmiş, əraziyə paraşütlə desant atılmış, desant-həmlə qrupu terror dəstəsini zərərsizləşdirmiş, bu zaman baş vermiş yanğını FHN-nin qüvvələri söndürmüş və xilasetmə işləri aparmışlar.
İkinci mərhələdə təxribat-kəşfiyyat qrupunun Xəzər dənizində və adalarda axtarışı və zərərsizləşdirilməsi prosesi həyata keçirilmişdir. Bu mərhələdə adada şərti rəqibin təxribat-kəşfiyyat qrupu zərərsizləşdirilmişdir. Bu məqsədlə sualtı dalğıc qrupunun adaya çıxması və düşmənin gözətçi xidmətinin səs salmadan zərərsizləşdirilməsi, çevik hərəkət qüvvələrindən olan dəniz kəşfiyyat qrupunun vertolyotlardan ada yaxınlığında dənizə atılması və adaya çıxması, çevik hərəkət qüvvələrinin desant həmlə qrupunun adaya havadan desant çıxarması, yaralıların və tutulmuş şəxslərin vertolyotlarla və “Zodiak” tipli katerlərlə döyüş əməliyyatı rayonundan təxliyə edilməsi qaydaları tətbiq olunmuşdur.
Üçüncü mərhələdə dənizdə axtarış, döyüş və xilasetmə əməliyyatları aparılmış, adaya terror-təxribat desant qrupu çıxarmış naməlum gəminin axtarılması və aşkar edilməsi tapşırığı yerinə yetirilmişdir. Bu zaman sərhəd gözətçi gəmilərinin birgə üzməsi (manevrlərin nümayiş etdirilməsi), onların vertolyotlarla birlikdə sərhəd axtarışını aparması, tabe olmayan və gəmilərimizə silah tətbiq edən hədəfə qarşı döyüş əməliyyatının keçirilməsi, qəzaya uğramış gəmidə yanğının FHN-nin gəmisi vasitəsilə söndürülməsi, qəzaya uğramış gəminin heyətinin vertolyotlar vasitəsilə, həmçinin suda boğulan insanların havadan atılan katerlərlə xilas olunması qaydaları nümayiş etdirilmişdir.
Taktiki təlim zamanı qarşıya qoyulan vəzifələr müvəffəqiyyətlə yerinə yetirilmiş, təlimə cəlb edilmiş hissə və bölmələr, eləcə də bütün şəxsi heyət verilmiş tapşırıqları məharətlə icra etmişlər.
Təlimi Baş nazirin birinci müavini Yaqub Eyyubov, fövqəladə hallar naziri general-polkovnik Kəmaləddin Heydərov, dövlət sərhəd xidmətinin rəisi general-leytenant Elçin Quliyev, Azərbaycan Prezidentinin müdafiə məsələləri üzrə köməkçisi general-leytenant Vahid Əliyev, Daxili Qoşunların komandanı general-leytenant Zakir Həsənov, Hərbi Dəniz Qüvvələrinin komandanı vitse-admiral Şahin Sultanov, Xüsusi Dövlət Mühafizə Xidmətinin rəsmiləri, həmçinin Gürcüstan və Ukrayna sərhəd xidmətlərinin nümayəndələri müşahidə etmişlər.
