XƏZƏR ŞELFİNDƏ, SU BASMAQ TƏHLÜKƏSİ OLAN ZONADA 2650 NEFT QUYUSU VAR
“KZ-today” qəzetinin yazdığına görə, Xəzər dənizi şelfində, qismən və tamamilə su basmaq təhlükəsi olan zonada 2650 sahibsiz neft quyusu var. Bununla əlaqədar Qazaxıstanın Atırau vilayətinin rəhbərliyi bu quyuların aşkar, müayinə və ləğv olunması üzrə işlərə maliyyə yardımı göstərilməsi xahişi ilə hökumətə müraciət etmişdir. Vilayətin Neft-Qaz İdarəsinin məlumatına görə, mühafizə qurğularının hüdudlarından kənarda kəşfiyyat aparılmış sahələr, ayrı-ayrı quyular var və bunların əksəriyyəti Xəzərin suları altında qalmışdır. Hazırda su altında qalmış zonada 56 quyu qazılmış 15 yataq mövcuddur. Onlar dövlət mülkiyyətidir və ola bilsin ki, yaxın vaxtlarda yeraltı sərvət istifadəçilərinə veriləcəkdir. Lakin təhlükəli vəziyyət qarşısında qalan bu quyularda indiyədək nə inventarlaşdırma aparılmış, nə də onların texniki vəziyyəti yoxlanılmışdır. Buna baxmayaraq, Qazaxıstan Energetika və Mineral Ehtiyatlar Nazirliyi 2003-cü il üçün plan çərçivəsində dövlət büdcəsi hesabına həmin neft quyularının aşkar edilməsi və yoxlanılması üzrə işlər aparılmasını nəzərdə tutmuşdur.
Bölmənin digər xəbərləri
