Xocalı faciəsi ermənilərin əsil milli kimliyini ortaya qoydu
Bakı, 26 fevral, AZƏRTAC
Kataliz və Qeyri-üzvi Kimya İnstitutunda Elmi Təşkilatların Birləşmiş Həmkarlar İttifaqı Komitəsi, Gənc Alim və Mütəxəssislər Şurasının və Yeni Azərbaycan Partiyasının təşkilatçılığı ilə Xocalı soyqırımının qurbanlarına həsr edilmiş tədbir keçirilib.
Bu barədə AZƏRTAC-a Kataliz və Qeyri-üzvi Kimya İnstitutundan bildirilib.
Əvvəlcə Xocalı soyqırımı qurbanları bir dəqiqəlik sükutla yad edilib.
Tədbirdə institutun baş direktoru akademik Dilqəm Tağıyev bildirib ki, xalqımız tarixən çox ağrı-acılı, qanlı-qadalı faciəvi günlər yaşayıb. Bunlardan ən dəhşətlilərindən biri məhz Xocalı soyqırımıdır. 33 il öncə Xocalıda yaşanan bu faciə yalnız bir xalqa qarşı deyil, ümumən insanlığın əleyhinə yönəlmiş bəşəri cinayət idi: “Ən böyük təskinliyimiz odur ki, işğal olunmuş torpaqlarımız artıq azaddır. Xalqımızın başına gətirilən faciələrin bir daha yaşanmaması üçün hər birimiz bir vətəndaş olaraq dövlətimizin, dövlətçiliyimizin yanında olmalı, onun artan gücünə öz əməli töhfələrimizi verməli və bu faciəni heç vaxt unutmamalıyıq. Artıq bütün Qarabağda olduğu kimi, Xocalıda da genişmiqyaslı bərpa-quruculuq işləri gedir və qaçqınlar doğma yurd-yuvalarına qayıdırlar”.
Elmi Təşkilatların Birləşmiş Azad Həmkarlar İttifaqının sədri professor Habil Qurbanov bildirib ki, o vaxt erməni hərbi birləşmələri Rusiyanın 366-cı motoatıcı alayının köməyi ilə Xocalı şəhərini yerlə-yeksan edərək soyqırımı törədib, insanlar xüsusi qəddarlıqla qətlə yetiriliblər və gənclər bu faciəni unutmamalıdırlar. Professor həmin günlərdə Milli Qəhrəman Allahverdi Bağırovun gördüyü işlərdən, xüsusilə əsir düşmüş Xocalı sakinlərinin azad olunmasında onun rolundan danışıb.
Daha sonra professorlar İxtiyar Bəxtiyarlı, Arif Əfəndi, Asif Məmmədov, böyük elmi işçi Elmir Babayev və başqaları çıxış ediblər. Qeyd olunub ki, bu faciə ermənilərin əsil milli kimliyini ortaya qoydu. Eyni zamanda, xalqımız üçün ciddi bir mesaj oldu. O gecə qətl edilən yüzlərlə insanın hələ də ürəyimizi sızladan faciəsi heç zaman yaddaşlardan silinməyəcəkdir.
Bölmənin digər xəbərləri
