XOCALI FACİƏSİ QURBANLARININ XATİRƏSİ MOSKVADA ANILMIŞDIR
Toplaşanlar Xocalı faciəsi qurbanlarının və fevralın 23-də Moskvada bazarın uçması nəticəsində həlak olmuş həmvətənlərimizin xatirəsini bir dəqiqəlik sükutla yad etmişlər.
Azərbaycanın Rusiyadakı səfiri Polad Bülbüloğlu xatirə gecəsini açaraq bildirmişdir ki, xalqımız Xocalı şəhərində baş vermiş o dəhşətli faciənin qurbanlarının xatirəsini həmişə yad edəcəkdir. Bu faciə əsil soyqırımıdır və şübhəsiz, müəyyən vaxtdan sonra hüquqşünaslar, beynəlxalq təsisatlar və ictimaiyyət bu fakta qiymət verəcəklər, çünki tarix boyu bu cür faktları gizləmək heç kimə müyəssər olmamışdır. Səfir demişdir: “Azərbaycan xalqı dünya ictimaiyyətinin diqqətini bu faciəyə mütləq cəlb edəcəkdir”.
P.Bülbüloğlu iştirakçılara Moskvada baş vermiş faciənin nəticələrinin aradan qaldırılması ilə bağlı görülən tədbirlər barədə də məlumat vermişdir. O vurğulamışdır ki, Azərbaycan Prezidenti İlham Əliyev hadisəyə böyük diqqət və qayğı ilə yanaşmışdır və həmvətənlərimizlə əlaqədar yaranmış vəziyyətə şəxsən nəzarət edir. Prezidentin şəxsi tapşırığı ilə fövqəladə hallar naziri K.Heydərov, səhiyyə naziri O.Şirəliyev Moskvaya ezam olunmuşdular. Səfir həmvətənlərimizə göstərdikləri operativ yardıma görə Moskva hökumətinə, şəxsən Moskva meri Y.Lujkova, Rusiya Fövqəladə Hallar Nazirliyinə də təşəkkürünü bildirmişdir. O, Azərbaycan diasporunun nümayəndələrini həmvətənlərimizə bundan sonra da diqqət göstərməyə və mənəvi dəstək olmağa çağırmışdır.
Səfirliyin birinci katibi Anar İmanov Xocalı faciəsi ilə bağlı tarixi faktlar haqqında məruzə etmişdir. O, ermənilərin Azərbaycan xalqına qarşı xəyanətkar və qəsbkarlıq siyasətindən ətraflı danışmışdır. Məruzədə deyilir ki, cinayət məcəlləsində törədilmiş cinayətə görə cəzanın labüdlüyü prinsipi var və dünya ictimaiyyəti bu faciəyə beynəlxalq-hüquqi qiymət verəcəkdir.
ÜAK Mərkəzi Şurasının üzvü, Rusiya Yazıçılar İttifaqının üzvü, Böyük Vətən müharibəsi veteranı Əbdul Hüseynov, ÜAK-ın vitse-prezidenti, “Ocaq” Azərbaycan mədəniyyəti Cəmiyyətinin sədri, professor Tofiq Məlikov, Beynəlxalq İnformasiyalaşdırma Akademiyasının həqiqi üzvü, Rusiya Yazıçılar İttifaqının və Azərbaycan Yazıçılar Birliyinin üzvü, Azərbaycanın fəxri elmlər doktoru Rudolf İvanov, Azərbaycan gənclərinin nümayəndələri bütün səviyyələrdə təbliğat işinə daha çox diqqət yetirilməsinin zəruriliyindən danışmışlar.
Səfirliyin foyesində Xocalı faciəsi qurbanlarının fotoşəkillərindən ibarət stend nümayiş etdirilmişdir. Stendin önünə Ümumrusiya Azərbaycan Konqresi adından əklil qoyulmuş, səfirliyin qarşısına al qərənfillər, Xocalı soyqırımı haqqında kitablar düzülmüşdür.
Xatirə gecəsində Azərbaycan diasporunun, Rusiya ictimaiyyətinin nümayəndələri iştirak etmişlər.
Bölmənin digər xəbərləri
