Xocalı soyqırımı insanlığa sığmayan cinayətdir
Tbilisi, 25 fevral, AZƏRTAC
Xocalı soyqırımı insanlığa sığmayan cinayətdir. Bu cür faciələrin bir daha təkrarlanmasına yol verilməməlidir.
AZƏRTAC xəbər verir ki, bu fikirlər fevralın 25-də Tbilisidə M.F.Axundzadə adına Azərbaycan Mədəniyyəti Muzeyində Xocalı soyqırımının 27-ci ildönümünə həsr olunmuş anım tədbirində səsləndirilib.
Mərasimdə Azərbaycanın Gürcüstandakı səfirliyinin məsul əməkdaşları, azərbaycanlı və gürcü ziyalılar, tələbə və gənclər iştirak ediblər.
Muzeyin direktoru, Azərbaycanın Əməkdar mədəniyyət işçisi Leyla Əliyeva tədbiri açdıqdan sonra Xocalı qurbanlarının xatirəsi bir dəqiqəlik sükutla yad edilib. Sonra L.Əliyeva Xocalı faciəsi barədə məlumat verib, bu hadisələrin dinc insanlara qarşı törədilmiş qəddar cinayət olduğunu bildirib. O deyib ki, 27 il bundan öncə günahsız qadın, qoca, körpə və uşaqlar vəhşiliklə qətlə yetiriliblər. Xocalı soyqırımı insanlığa sığmayan cinayətdir. Bu cür faciələrin bir daha təkrarlanmasına yol verilməməlidir.
Tədbirdə azərbaycanlı gənclərin “Difai” təşkilatının hazırladığı “Azərbaycan və Gürcüstan xalqlarının oxşar tarixi taleyi” adlı təqdimat nümayiş etdirilib. Azərbaycan və gürcü dillərində olan təqdimatda hər iki ölkənin yaxın keçmişində baş vermiş işğal faktları, faciələr və soyqırımları barədə ətraflı məlumat tədbir iştirakçılarının diqqətinə çatdırılıb.
Azərbaycanın Gürcüstandakı səfirliyinin əməkdaşları çıxış edərək Xocalı faciəsinin Azərbaycan xalqının ən ağrılı dərdlərindən biri olduğunu qeyd ediblər. Bildirilib ki, bu cür anım tədbirlərinin keçirilməsində məqsəd Xocalı soyqırımı barədə həqiqətlərin Gürcüstan ictimaiyyətinə çatdırılması və faciəyə ədalət, günahkarlara cəza tələb etməkdir.
Tədbir çərçivəsində Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənovun gürcü dilində çap olunmuş “Azərbaycanlılara qarşı etnik təmizləmə və soyqırımı siyasəti” adlı kitabı təqdim olunub. Kitabda son iki əsrdə azərbaycanlılara qarşı erməni millətçilərinin məqsədyönlü şəkildə həyata keçirdiyi etnik təmizləmə, soyqırımı və təcavüzkarlıq siyasəti təhlil olunub.
Gürcü politoloq Tengiz Txilava kitabı Gürcüstan ictimaiyyətinin ermənilər tərəfindən Azərbaycan xalqına qarşı törədilmiş soyqırımları barədə məlumatlandırılması baxımından yüksək qiymətləndirib. O deyib: “Gürcüstan tarixində də ermənilər gürcü xalqına qarşı soyqırımları törədiblər. Lakin təəssüflər olsun ki, bu soyqırımı faktları barədə Gürcüstanda susmağa üstünlük verirlər. Bu, çox yanlış yanaşmadır. Gürcüstan və Azərbaycan birgə fəaliyyət göstərməklə əsl tarixi həqiqətləri dünya ictimaiyyətinə çatdırmalıdır”.
Tədbir gürcü və azərbaycanlı ziyalıların çıxışları ilə davam etdirilib.
Mərasim iştirakçıları, həmçinin Xocalı faciəsinə həsr olunmuş fotosərgi ilə tanış olublar. Sərgidə soyqırımını əks etdirən fotoşəkillərlə yanaşı, muzeyin rəssamlıq dərnəyinin şagirdlərinin Xocalı haqqında çəkdikləri rəsmlər də sərgilənib.
Sonda Xocalı qurbanlarının ruhuna ehsan verilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
