QAN YADDAŞI
“XOCALI SOYQIRIMI” KİTABI İNGİLİS DİLİNDƏ NƏŞR OLUNMUŞDUR
Bakı, 17 fevral (AZƏRTAC). Milli Məclisin deputatı Havva Məmmədovanın ingilis dilində nəşr edilmiş “Xocalı soyqırımı” kitabının təqdimat mərasimi keçirilmişdir.
Kitab erməni əsirliyində olmuş və dəhşətli işgəncələrə məruz qalmış qadınların söylədikləri tükürpədici səhnələr əsasında qələmə alınmışdır. Bildirilmişdir ki, 1992-ci il fevralın 25-dən 26-na keçən gecə Xocalının işğalı zamanı qaniçən erməni quldurları 613 nəfərin, o cümlədən 106 qadının və 63 uşağın həyatına son qoymuş, 8 ailəni tamamilə məhv etmişlər. Xocalı şəhərinin heç bir təqsiri olmayan 1275 sakini - qocalar, uşaqlar və qadınlar girov götürülmüş, bu insanlar ağlasığmaz işgəncələrə və təhqirlərə məruz qalmışlar. Girov götürülənlərdən 150 nəfərin, o cümlədən 68 qadının və 26 uşağın taleyi hələ də məlum deyildir.
“Nurlan” nəşriyyatında çapdan çıxmış klitabda qətlə yetirilən 509 Xocalı sakininin, 224 nəfər valideynlərindən birini, 25 nəfər hər iki valideynini itirmiş uşağın, 29 ailədən 155 nəfər itkin düşmüş insanların adı, təvəllüdləri verilmişdir.
Tədbirdə çıxış edən Milli Məclisin deputatları Qənirə Paşayeva, Lalə Abbasova, Baba Tağıyev, Aydınxan Həsənov “Xocalı soyqırımı” kitabında adları çəkilən canlı şahidlərin başlarına gətirilən bu faciələri dünya ictimaiyyətinə çatdırmağın vacibliyini söyləmişlər.
Bildirilmişdir ki, kitabın fevralın 18-dən 28-dək “Xocalı həftəsi” çərçivəsində ABŞ-da təqdimatı keçiriləcəkdir.
######