QAN YADDAŞI
XOCALI SOYQIRIMININ 17-Cİ İLDÖNÜMÜ İLƏ ƏLAQƏDAR AVROPA ÖLKƏLƏRİNDƏ ANMA MƏRASİMLƏRİ KEÇİRİLƏCƏKDİR
Bakı, 21 fevral (AZƏRTAC). Diaspor ilə İş üzrə Dövlət Komitəsindən bildirmişlər ki, Xocalı soyqırımının 17-ci ildönümü ilə əlaqədar Avropa ölkələrində silsilə tədbirlər keçiriləcəkdir. Bütün tədbirlərdə Heydər Əliyev Fondunun təbliğat materiallarından geniş istifadə olunacaqdır.
Strasburqda fevralın 26-da Avropa Parlamentlər Assosiasiyasının binasında XX əsrin ən dəhşətli faciələrindən biri - Xocalı soyqırımına həsr olunmuş anma mərasimi keçiriləcəkdir. Tədbirdə Azərbaycanın Avropa Şurası yanındakı daimi nümayəndəliyinin, Azərbaycan və türk diaspor təşkilatlarının, bu şəhərdə təhsil alan gənclərimiz, yerli və xarici qurumların nümayəndələri iştirak edəcəklər.
Mərasim iştirakçılarına Xocalı soyqırımı, Ermənistan-Azərbaycan, Dağlıq Qarabağ münaqişəsi barədə Heydər Əliyev Fondunun müxtəlif dillərdə nəşr etdiyi materillar təqdim olunacaq, ermənilərin xalqımıza qarşı törətdiyi terror və soyqırımı aktlarına dair geniş məlumat veriləcək, faciədən bəhs edən film və fotostend nümayiş etdiriləcəkdir. Elektron KİV-lərdə faciəyə dair məlumatların yerləşdirilməsi, “dəyirmi masa” keçirilməsi də nəzərdə tutulmuşdur. Daimi nümayəndəlik faciə barədə mətbuat açıqcaları hazırlayaraq, Avropa Şurasının katibliyində, üzv ölkələrin daimi nümayəndəliklərində, habelə Strasburqda fəaliyyət göstərən konsulluqlarda yayacaqdır.
Strasburqdakı “Azərbaycan evi” də Azərbaycan Mədəni Əlaqələr və Azərbaycan Kültür Cəmiyyətləri, Azərbaycanlı Tələbələr Assosiasiyası, Miluzdakı Fransa-Azərbaycan Mədəniyyət Assosiasiyası ilə birlikdə Xocalı soyqırımı barədə həqiqətləri fransız ictimaiyyətinə çatdırmaq məqsədi ilə proqram hazırlamışdır. “Azərbaycan evi” fevralın 28-də Strasburqun mərkəzindəki meydanda nümayiş keçirəcəkdir. Aksiyanın keçirilməsi barədə Strasburq bələdiyyəsindən razılıq alınmışdır. Nümayiş vaxtı yerli sakinlərə Heydər Əliyev Fondunun Xosalı faciəsi ilə bağlı ingilis və fransız dillərində hazırladığı kitablar və digər təbliğat materialları paylanacaqdır. Fevralın 29-da yerli radioda Xocalı soyqırımına həsr olunmuş xüsusi veriliş səslənəcəkdir.
Almaniyada da Xocalı soyqırımı ilə bağlı tədbirlər keçiriləcəkdir. Fevralın 26-da Diaspor ilə İş üzrə Dövlət Komitəsi sədrinin birinci müavini Valeh Hacıyev, Alman-Azərbaycan Forumunun prezidenti Otto Hauzerlə birlikdə Frankfurtdakı “FOX” televiziyasında canlı efirdə Xocalı soyqırımı barədə çıxış edəcəklər. Daha sonra V.Hacıyevin Maynts Azərbaycan Cəmiyyətinin sədri Başar Kömür və Frankfurt Azərbaycan Cəmiyyətinin sədri Kəmalə İsgəndərova ilə birlikdə “Kanal Avropa”nın və TQRT-nin Almaniya nümayəndəliyinin canlı efirində soyqırımla bağlı çıxışları nəzərdə tutulmuşdur.
Berlində isə Almaniyadakı Azərbaycanlıların Koordinasiya Mərkəzi Bundestaqın üzvlərinin də dəvət olunacağı anma tədbirində soyqırımı ilə bağlı sənədli film nümayiş etdirəcək, uşaq rəsmlərindən ibarət sərgi təşkil olunacaqdır.
Berlinin mərkəzi meydanlarından birində “Azərbaycan Evi” və Alman-Azərbaycan Həmrəylik Cəmiyyəti mitinq keçirəcəkdir.
Daha bir etiraz aksiyası Hollandiyanın Haaqa şəhərində baş tutacaqdır. “Ana Vətən” Avropa Azərbaycanlı Qadınlar Cəmiyyəti fevralın 22-də Xocalı soyqırımı ilə bağlı hazırlanmış şüarlarla Sülh Sarayının qarşısında piket keçirəcək, Xocalı soyqırımı qurbanlarının xatirəsinə Haaqada ucaldılmış abidəni ziyarət edəcəkdir. Hollandiya Azərbaycan Türk-Kültür Dərnəyi isə martın 1-də Haaqadakı Xocalı abidəsinin önündə anma tədbiri keçirəcəkdir. Mərasimdə Azərbaycan və Türkiyənin Niderland Krallığındakı səfirləri, Azərbaycan və türk diaspor təşkilatlarının fəalları iştirak edəcəklər.
Fevralın 26-da Belçika-Azərbaycan Evinin təşəbbüsü ilə Brüsselin Şuman meydanında soyqırımın 17-ci ildönümü ilə əlaqədar çadır qurulacaqdır. Çadırda Heydər Əliyev Fondu tərəfindən göndərilmiş foto və rəsm əsərlərinin sərgisi nümayiş etdiriləcək, yerli televiziyalardan birində Xocalı qırğını barədə film göstəriləcəkdir.
Almaniyanın Köln şəhərindəki Vahid Azərbaycan Cəmiyyətinin üzvləri də Brüsselə gələrək buradakı Azərbaycan və türk diaspor təşkilatlarının iştirakı ilə Avropa Parlamentinin binası qarşısında tədbir keçirəcəklər. Soyqırımı qurbanlarının anma günündə Azəri Türk Qadınlar Birliyi də Brüsseldəki Square de Meeuse meydanında mitinq keçirəcək, buradan isə Avropa Parlamenti binasının yerləşdiyi Şuman meydanına yürüş olacaqdır.
Fevralın 21-də İsveçin Linköpinq şəhərində fəaliyyət göstərən “Babək” dərnəyi şəhərin Tradgardstorget meydanında manifest təşkil edəcək, bir gün sonra isə Stokholm şəhərindəki Sergelstorg meydanında Azərbaycan diaspor təşkilatları Xocalı qətliamına etiraz olaraq mitinq keçirəcəklər.
İsveçrədə fəaliyyət göstərən Azərbaycanlıların Mədəniyyət Mərkəzi fevralın 25-də Berndə bu ölkənin parlament üzvlərinin, tanınmış siyasətçilərin və KİV nümayəndələrinin iştirakı ilə konfrans keçirərək, Xocalı soyqırımına, tarixi gerçəkliklərə bir daha diqqət yönəldəcəkdir.
Danimarkadakı “Vətən” Cəmiyyəti Xocalı faciəsinin ildönümünü soyqırımı haqqında sənədli filmin nümayişi, bröşürlər və kitabların təqdimatı ilə qeyd edəcəkdir.