Xocalı soyqırımının 27-ci ildönümü ilə əlaqədar Aşqabadda anım tədbiri təşkil olunub
Aşqabad, 26 fevral, AZƏRTAC
Azərbaycanın Türkmənistandakı səfirliyi tərəfindən Xocalı soyqırımının 27-ci ildönümü ilə bağlı anım tədbiri keçirilib.
AZƏRTAC xəbər verir ki, tədbirdə çıxış edən Azərbaycanın Türkmənistandakı səfiri Həsən Zeynalov 1992-ci il fevralın 26-na keçən gecə Xocalı şəhərinə ermənilər tərəfindən bütün istiqamətlərdən hücum edildiyini, nəticədə erməni silahlı birləşmələrinin keçmiş sovet ordusunun 366-cı motoatıcı alayının köməyi ilə Xocalının işğalını həyata keçirdiyini qeyd edib. İşğalçıların Xocalını viran etdiklərini, onun dinc əhalisini xüsusi amansızlıqla qırdıqlarını deyən səfir 106-sı qadın, 63-ü uşaq və 70-i ahıl olmaqla, 613 mülki şəxsin qətlə yetirildiyini, 8 ailənin tamamilə məhv edildiyini, 25 uşağın hər iki valideynini itirdiyini, mindən çox sakinin yaralandığını, 1275 şəxsin əsir götürüldüyünü, 150 sakinin itkin düşdüyünü və sadəcə azərbaycanlı olduqları üçün onlara qarşı bu qırğının həyata keçirildiyini diqqətə çatdırıb.
Erməni silahlı birləşmələri tərəfindən dinc sakinlərin kütləvi şəkildə öldürülməsinin, əsirlərin və meyitlərin təhqir edilməsinin dünya üçün sirr olmadığını qeyd edən səfir bunun Ermənistanın keçmiş prezidenti Serj Sarkisyan tərəfindən də fəxrlə etiraf edildiyini bildirib.
Xocalıda mülki əhalinin qırğınının Ermənistanın mənfur və amansız etnik təmizləmə siyasətinin tərkib hissəsi olduğunu bildirən səfir bu qətliamın beynəlxalq cinayət hesab olunduğunu, bu əməlləri törədən, onlarla əlbir olanların hər birinin məsuliyyət daşıdığını qeyd edib.
Xocalı qırğınının soyqırımı kimi tanıdılmasının Azərbaycanın xarici siyasətinin vacib məsələlərindən olduğunu bildirən səfir bir sıra ölkələrin, həmçinin İslam Əməkdaşlıq Təşkilatının Xocalıda dinc əhalinin qırğınının pislənilməsinə və Xocalı faciəsinin soyqırımı və insanlıq əleyhinə cinayət əməli kimi tanınmasına dair qərarlar qəbul etdiklərini tədbir iştirakçılarının diqqətinə çatdırıb.
Həsən Zeynalov “Xocalıya ədalət!” aksiyası çərçivəsində atılan addımların əhəmiyyətini qeyd edərək, beynəlxalq hüquq çərçivəsində görülən tədbirlərin cəzasızlığa son qoyulmasına və Ermənistanın Azərbaycana qarşı təcavüzü fonunda törədilmiş ağır cinayətlərə görə məsuliyyət daşıyan şəxslərin ədalət mühakiməsinə cəlb edilməsinə xidmət edəcəyinə əminliyini bildirib.
26 fevral tarixinin həm də Sumqayıt hadisələri ilə xarakterizə olunduğunu bildirən diplomat Sumqayıtda baş verənlərin Dağlıq Qarabağ münaqişəsinin alovlandırılması istiqamətində ermənilərin sovet rəhbərliyi və təhlükəsizlik orqanları ilə birgə təşkil etdiyi xüsusi hazırlanmış ssenari olduğunu qeyd edib. Təsadüfi deyil ki, Sumqayıt hadisələrinin ildönümü günü Xocalı soyqırımını törədən ermənilər Sumqayıtın “intiqamı”nı aldıqlarını bildirirdilər.
Böyük bir hissəsinin uşaq, qadın və qocalardan ibarət olduğu dinc mülki əhaliyə qarşı onların milli mənsubiyyətinə görə edilən bu hərəkətlərin heç bir izahının, bəraətinin olmadığını, bu soyqırımını törədənlərin ən ağır şəkildə cəzalanmalı olduqlarını ifadə edən tədbir iştirakçıları soyqırımı qurbanlarının xatirəsinin hər bir azərbaycanlının qəlbində daim yaşayacağını bildiriblər.
Çıxışlardan sonra tədbir iştirakçıları Xocalı soyqırımını əks etdirən fotosərgiyə və videomateriallara baxıblar.
İlahə Əhmədova
AZƏRTAC-ın xüsusi müxbiri
Aşqabad
Bölmənin digər xəbərləri
