Yaponiya hökuməti Kitakyuşuda kütləvi koronavirus yoluxmasından sonra vətəndaşları ehtiyatlı olmağa çağırır
Tokio, 1 iyun, AZƏRTAC
Yaponiya hökuməti Kitakyuşu şəhərində kütləvi koronavirus yoluxmasından sonra vətəndaşları ehtiyatlı olmağa çağırır.
AZƏRTAC xəbər verir ki, bu barədə Yaponiyada koronavirusla mübarizəyə cavabdeh olan İqtisadiyyatın Bərpası naziri Nişimura Rasutoşi bəyan edib. Nazir bildirib ki, virusun yoluxması ilə bağlı ilkin mənbələr aşkar olunduğuna görə hökumət təkrar fövqəladə vəziyyət rejimi tətbiq etmək niyyətində deyil.
Bununla yanaşı, nazir qeyd edib ki, hakimiyyət orqanları virusa yoluxanların sayı kəskin artdığına görə vəziyyətin böhran həddinə çatdığını etiraf edir.
Hökumətdəki digər mənbələrin bildirdiyinə görə, koronavirus yoluxmasının digər rayonlarda da artma ehtimalı böyükdür. Buna görə də onlar sakinlərdən ehtiyatlı olmağı, sosial məsafəni gözləməyi və tibbi maskalardan istifadəni davam etdirməyi xahiş edirlər.
Eyni zamanda, qonşuluqda yerləşən Fukuoka və Yamaquçi prefekturalarının sakinlərindən Kitakyuşuya səfərləri təxirə salmaları da xahiş olunur.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
