Yaponiya ictimaiyyəti Ermənistanın Azərbaycana qarşı son təxribatları barədə ətraflı məlumatlandırılıb
Tokio, 6 oktyabr, AZƏRTAC
Azərbaycanın Yaponiyadakı səfiri Gürsel İsmayılzadə bu ölkənin AMIA (Active Middle International Association) qeyri-hökumət təşkilatının üzvlərini Ermənistan-Azərbaycan Dağlıq Qarabağ münaqişəsi barədə ətraflı məlumatlandırıb.
AZƏRTAC xəbər verir ki, onlayn formatda keçirilən görüşdə qarşı tərəfə Ermənistan ordusunun Azərbaycana qarşı son təxribatları barədə də ətraflı məlumatlar çatdırılıb.
Qeyd edək ki, Yaponiyanın AMIA təşkilatı dünyada baş verən siyasi proseslərlə bağlı araşdırmalar aparır və müvafiq mövzularda seminarlar keçirir. Təşkilatın üzvləri isə Yaponiyanın əsasən ictimai-siyasi xadimləri, jurnalistlər, elm və biznes dairələrinin nümayəndələridir. Təşkilat Yaponiyada akkreditə edilmiş diplomatik nümayəndəliklərlə də əməkdaşlıq edir və onların iştirakı ilə seminarlar təşkil edirlər.
G.İsmayılzadə çıxışında Azərbaycandakı hazırki siyasi, iqtisadi və ictimai vəziyyəti, o cümlədən ölkə rəhbərliyi tərəfindən həyat keçirilən geniş iqtisadi islahatlar, qeyri-enerji sektorunun inkişafı ilə əlaqədar görülən tədbirlər barədə ətraflı məlumat verib.
Ermənistan-Azərbaycan Dağlıq Qarabağ münaqişəsi barədə danışan səfir ötən əsrin 80-ci illərinin sonlarında başlayan münaqişə nəticəsində Ermənistan ordusu tərəfindən ərazilərimizin 20 faizinin işğal olunduğunu, 30 mindən çox insanın həyatını itirdiyini, bir milyondan çox azərbaycanlının qaçqın və məcburi köçkünə çevrildiyini görüş iştirakçılarının diqqətinə çatdırıb.
Səfir bildirib ki, cari il sentyabrın 27-də saat 6:00 radələrində Ermənistan silahlı qüvvələri atəşkəs rejimini kobud şəkildə pozaraq Azərbaycan Ordusunun cəbhə zonasında yerləşən mövqelərini iriçaplı silahlardan, minaatanlardan və artilleriya qurğularından intensiv atəşə tutub. Ermənistan silahlı qüvvələrinin mülki insanların sıx şəkildə yaşadığı yerləri və obyektləri intensiv şəkildə atəşə tutması nəticəsində mülki əhali və hərbi qulluqçular həlak olub, yaralanıb, çoxsaylı evə və mülki obyektə ciddi ziyan dəyib. Ermənistanın növbəti dəfə mülki əhalini qəsdən hədəfə alması beynəlxalq hüquq normalarının, o cümlədən beynəlxalq humanitar hüququn, Cenevrə konvensiyalarının müvafiq müddəalarının kobud surətdə pozulmasıdır.
G.İsmayılzadə qeyd edib ki, beynəlxalq hüququn norma və prinsiplərinə məhəl qoymayan Ermənistanın təxribatçı hərəkətlərini davam etdirməklə fundamental insan hüquqlarını kobud şəkildə pozması, regionda daha da təhlükəli vəziyyət yaratması beynəlxalq təşkilatlar və sülhsevər dövlətlər tərəfindən kəskin şəkildə pislənilməli, bu təcavüz dayandırılmalıdır. Səfir vurğulayıb ki, Ermənistanın Azərbaycana qarşı son təcavüz aktı yaxın aylar ərzində, o cümlədən iyulun 12-dən 16-dək Tovuz istiqamətində hücum cəhdi, avqustun 23-də Goranboy istiqamətində diversiya-kəşfiyyat təxribatı, Azərbaycanın işğal olunmuş ərazilərində qeyri-qanuni məskunlaşdırma siyasətinin aparılması, eləcə də Ermənistan rəhbərliyinin təhrikçi bəyanatları və fəaliyyətinin davamıdır.
Diplomatımız bildirib ki, Azərbaycan Respublikasının Silahlı Qüvvələri Ermənistanın növbəti hərbi təcavüzünün qarşısını almaq və təmas xətti boyunca sıx şəkildə yaşayan mülki əhalinin təhlükəsizliyini təmin etmək məqsədilə özünü müdafiə hüququ çərçivəsində və beynəlxalq humanitar hüquqa tam riayət etməklə əks-hücum və cavab tədbirləri həyata keçirir. Ermənistanın vəziyyətin gərginləşməsinə xidmət edən təhrikedici əməllərinə görə bütün məsuliyyət onun siyasi-hərbi rəhbərliyinin üzərinə düşür.
Sonda G.İsmayılzadə iştirakçıların suallarını ətraflı cavablandırıb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
