Yay məktəbində gənclərin ətraf mühitin qorunması istiqamətində praktiki bilikləri artırılacaqdır
Bakı, 29 avqust (AZƏRTAC). Avqustun 29-da Ekologiya və Təbii Sərvətlər Nazirliyinin (ETSN) və IDEA Ətraf Mühit Naminə Beynəlxalq Dialoq Kampaniyasının birgə təşkilatçılığı ilə “Ətraf mühitin indiki və gələcək nəsillər naminə mühafizəsi” mövzusunda keçiriləcək yay məktəbinin açılışı olmuşdur.
Açılış mərasimində nazirliyinin mütəxəssisləri dövlətin ekologiya sahəsində həyata keçirdiyi uğurlu siyasətdən və bu istiqamətdə gənclərin fəal rolundan danışmışlar.
ETSN-in mətbuat xidmətindən AZƏRTAC-a bildirmişlər ki, tədbirdə IDEA kampaniyasının nümayəndəsi Ramiz Babayev gənclərin ətraf mühitin qorunması istiqamətində praktiki biliklərinin artırılmasının zəruriliyini qeyd etmişdir.
Bildirilmişdir ki, yay məktəbində ali təhsil müəssisələri tələbələri və məzunları arasında ətraf mühitin mühafizəsinin vacibliyi ideyalarını geniş təbliğ etmək məqsədi ilə 50-dək gəncə bir həftə ərzində mühazirələr oxunacaq və onlar görülmüş işlərlə yerində tanış olacaqlar. Eyni zamanda, gənclər üçün ekskursiyaların təşkili nəzərdə tutulmuşdur.
Yay məktəbinin məqsədi gənclərin ətraf mühit və təhlükəsizlik sahəsində bilik və bacarıqlarının artırılmasından, gənc nəslin ekoloji mədəniyyət səviyyəsinin təkmilləşdirilməsindən ibarətdir.
Bölmənin digər xəbərləri
