Yeni tədqiqat: GPT-4 neyron şəbəkəsi dialoq əsnasında insanlardan daha inandırıcı cavablar verir
Bakı, 20 may, AZƏRTAC
Avropa və ABŞ alimlərindən ibarət tədqiqat qrupu aşkar edib ki, GPT-4 neyron şəbəkəsi qlobal şəbəkənin real istifadəçiləri ilə müqayisədə sosial-siyasi debatlarda opponentlərin suallarına 64 faiz daha inandırıcı cavab vermək və rəqibin fikirlərini nəzərə alaraq öz mövqeyini əsaslandırmaq qabiliyyətinə malikdir. AZƏRTAC xəbər verir ki, tədqiqatçıların “Nature Human Behaviour” elmi jurnalında dərc etdirdiyi məqaləyə görə, onlayn müzakirə platformalarının hazırlanması və istismarı zamanı bunu nəzərə almaq lazımdır.
Məqalədə qeyd olunub: “Böyük dil modelləri ilə aparılan ilk təcrübələr göstərdi ki, süni intellekt daha inandırıcı arqumentlər yarada bilir, lakin bu kontekstdə ondan zərərli istifadə potensialı da yüksəkdir. Bu üstünlükləri konkret şəxslərə uyğunlaşdırmaq qabiliyyəti hələ öyrənilməyib. Biz debatlarda GPT-4 sisteminin fərdi tədqiqat məlumatlarına giriş əldə etdiyi zaman 64 faiz daha uğurlu olduğunu göstərdik”.
Kəşf Lozannadakı İsveçrə Federal Texnologiya İnstitutunun dosenti Robert Uestin rəhbərlik etdiyi isveçrəli, italyan və amerikalı tədqiqatçılar tərəfindən insanların fikir və davranışlarını manipulyasiya etmək üçün böyük dil modellərindən zərərli istifadə potensialının öyrənilməsinə yönəlmiş genişmiqyaslı layihə çərçivəsində edilib.
Alimlərin qeyd etdiyi kimi, xüsusi təhlükə GPT-4 və digər “qabaqcıl” süni intellekt sistemlərinin insanın davranışına və baxışlarına ən effektiv təsir göstərmək üçün rəqib haqqında şəxsi məlumat və biliklərdən istifadə edə bilməsidir. Tədqiqatçılar bu ehtimalı qiymətləndirmək üçün 900 təsadüfi amerikalı istifadəçidən nisbətən neytral və ya mübahisəli sosial və ya siyasi mövzuda onlayn debatda iştirak etməyi xahiş ediblər.
Bu debatların hər raundunda iştirakçılar məsələyə dair əvvəlcədən müəyyən edilmiş nöqteyi-nəzərdən mümkün olan ən inandırıcı arqumentlər hazırlamalı, onları rəqibinə və auditoriyaya təqdim etməli, həmçinin opponentinin konkret bir şəxs deyil, neyron şəbəkəsi olması ehtimalını qiymətləndirməli idilər. Əslində, bu ya digər könüllülər, ya da GPT-4 ola bilərdi və hər iki halda alimlər bəzən debat iştirakçılarından birinə rəqibin məlumatlarına əvvəlcədən giriş imkanı verirdilər.
Bu söhbətlərin sonrakı təhlili göstərib ki, süni intellekt sistemi debatda ümumiyyətlə insanlardan üstün olub və canlı rəqibin fikirləri, habelə şəxsi təfərrüatları haqqında məlumat verildikdə, GPT-4 rəqibindən 64 faiz daha inandırıcı cavablar verib. Fərdi məlumatlardan istifadə etmək bacarığı süni intellektə könüllüləri inandırmağa və onları öz nöqteyi-nəzərini dəyişməyə məcbur etməyə imkan verib ki, bu da dialoq əsnasında bu cür mübahisələr üçün onlayn platformalar yaradarkən süni intellektin “manipulyator potensialını” nəzərə almaq zərurətini vurğulayır.
Bölmənin digər xəbərləri
