Bakı, 2 aprel, AZƏRTAC

Ölkəmiz müstəqilliyini bərpa etdikdən sonra idmanımız şərəfli yol keçib. İdmançılarımız bu müddət ərzində dünyanın müxtəlif arenalarında öz sözlərini deyib, üçrəngli bayrağımızı ucaldaraq himnimizi səsləndiriblər.

Bu sözləri AZƏRTAC-a məxsusi müsahibəsində Azərbaycan Milli Paralimpiya Komitəsinin (AMPK) prezidenti İlqar Rəhimov deyib.

AMPK rəsmisi qeyd edib ki, ümummilli lider Heydər Əliyevin yenidən ölkə rəhbərliyinə qayıdışından sonra yaranan sosial-siyasi sabitlik dövründə Azərbaycanda müxtəlif sahələrin inkişafına təkan verilib. Əlbəttə ki, bu istiqamətlərdən biri də ölkə idmanının yeni səviyyəyə çıxması idi. Məhz bu dövrdə - 1996-cı ildə AMPK təsis edilib və həmin il Azərbaycan paralimpiyaçıları ümummilli lider Heydər Əliyevin xeyir-duası ilə ilk dəfə Atlanta Yay Paralimpiya Oyunlarına yola düşüblər. Ulu Öndərin dəyərli tövsiyələri hər zaman idmançılarımızı ruhlandıraraq Paralimpiya Oyunlarında qələbələrimizin əsasını qoyub.

“2000-ci il Sidney Yay Paralimpiya Oyunları ərəfəsində ümummilli lider Heydər Əliyevin idmançılarımızın Paralimpiya Oyunlarına yolasalma mərasimində iştirak etməsi, həmin ərəfədə Ulu Öndərin paralimpiyaçılarımız üçün Sumqayıtda yeni, beynəlxalq standartlara cavab verən Paralimpiya İdman Kompleksinin tikilməsi haqqında tapşırıq verməsi ölkəmizin idman həyatında müsbət dəyişikliklər və qələbələrə təkan verdi. Həmin dövrdən ölkədə Paralimpiya hərəkatı daha sürətli inkişaf yoluna qədəm qoydu. Bunun başlıca səbəbi, hazırda ulu öndər Heydər Əliyev kursunun layiqli davamçısı, ölkə başçısı İlham Əliyevin Milli Olimpiya Komitəsinin prezidenti seçilməsi oldu. Onun gəlişi ilə Azərbaycan idmanının fəth etdiyi zirvələr göz qabağındadır. Bu mənada paralimpiyaçıların da diqqətdən kənarda qalmaması, onlara diqqət və qayğının artması yarışlarda əldə edilən nəticələrin əyani göstəricisidir. Həmin vaxt AMPK prezidentinin Milli Olimpiya Komitəsinin İcraiyyə Komitəsinə üzv seçilməsi təşkilati məsələlərdə həmrəyliyin və birliyin nümunəsi oldu”, - deyə İ.Rəhimov əlavə edib.

Ümummilli lider Heydər Əliyevin tapşırığı ilə Sumqayıtda inşa edilmiş Paralimpiya İdman Kompleksinin 2008-ci il avqustun 28-də açılış mərasiminin keçirildiyini diqqətə çatdıran İ.Rəhimov bildirib: “MDB məkanında ilk dəfə paralimpiyaçılar üçün belə bir kompleksin istifadəyə verilməsi ölkəmizdə Paralimpiya hərəkatının inkişafında yeni mərhələ açdı. Tədbirdə Azərbaycan Prezidenti, paralimpiyaçıların dostu İlham Əliyev və Birinci vitse-prezident Mehriban xanım Əliyeva iştirak etmişdilər. Dövlət başçısı çıxışında demişdi: “Paralimpiyaçıların idmana olan sədaqəti və xüsusilə Azərbaycan paralimpiyaçılarının uğurları və beynəlxalq yarışlarda iştirakı böyük qəhrəmanlıqdır. Azərbaycan dövləti sizin bu səylərinizi çox yüksək qiymətləndirir və qiymətləndirməlidir. Məhz buna görə maksimum dərəcədə çalışırıq ki, sizin üçün lazımi şəraiti yaradaq. O cümlədən belə gözəl idman mərkəzinin tikintisi bunu bir daha sübut edir. Mən çox şadam ki, Azərbaycanda Paralimpiya Komitəsi fəaliyyətini genişləndirir və ümumiyyətlə, Paralimpiya oyunlarında iştirak edən idmançıların sayı artır. Bizim Paralimpiya oyunlarında nəticələrimiz hər dəfə daha da böyük olur. Azərbaycan dövləti paralimpiyaçıların mükafatlandırılması üçün lazımi tədbirlər görür və görəcəkdir. Bir də demək istəyirəm ki, paralimpiyaçılar, sözün əsl mənasında, fədakar insanlardır. Onlar zədələrdən, yaralardan, bəzən sağalmayan yaralardan əziyyət çəkirlər. Ancaq buna baxmayaraq, öz fədakarlığını göstərərək, idmanla məşğul olur, Azərbaycanı təbliğ edirlər. Beynəlxalq yarışlarda Azərbaycanın bayrağını qaldırırlar və Azərbaycan xalqı bunu çox yüksək qiymətləndirir. Azərbaycan dövləti də çalışır ki, əlindən gələni etsin ki, sizin şəraitiniz, həyatınız daha da yaxşı olsun”.

İ.Rəhimov vurğulayıb ki, paralimpiyaçılarımız ölkə başçısının qayğısını həmişə hiss edirlər. Beynəlxalq yarışlarda yüksək nailiyyətlər qazanan idmançılarımız və onların məşqçiləri Prezidentin sərəncamlarına əsasən orden və medallarla təltif olunurlar. Paralimpiyaçılarımızın maddi rifahı, məişət şəraiti yaxşılaşdırılır. Ötən illər ərzində respublikamızda Paralimpiya hərəkatının əhatə dairəsi xeyli genişlənib. İndi paralimpiyaçılarımızın məşğul olduğu idman növlərinin sayı 18-ə çatdırılıb. 2013-cü ilin sentyabrında bu hərəkatın tarixində dünya miqyasında ilk dəfə Azərbaycanda Uşaq Paralimpiya Komitəsi yaradılıb. Təşkilatın əsas məqsədi sağlamlıq imkanları məhdud uşaqları idmana cəlb etməklə onların abilitasiya və reabilitasiya yolu ilə cəmiyyətə inteqrasiyasına nail olmaq kimi müəyyənləşdirilib. Belə bir üsulla seçmə komandalarımıza ehtiyat qüvvə hazırlanır. Artıq qürur hissə ilə vurğulaya bilərik ki, sonuncu Paralimpiya Oyunlarında uşaq paralimpiya hərəkatının iki yetirməsi iştirak edib, onlardan biri Paralimpiya çempionu adını qazanıb. Gənclər və İdman, Əmək və Əhalinin Sosial Müdafiəsi nazirlikləri də ölkədə Paralimpiya hərəkatının inkişafına öz töhfələrini verirlər.

AMPK-nın beynəlxalq əlaqələrin genişləndirilməsinə, müxtəlif idman qurumları, Beynəlxalq Paralimpiya Komitəsi, habelə ayrı-ayrı ölkələrin müvafiq təşkilatları ilə əməkdaşlığa böyük əhəmiyyət verdiyini diqqətə çatdıran İ.Rəhimov bildirib: “Paralimpiyaçılarımız, həmçinin Bakıda ilk Avropa Oyunları, eləcə də dördüncü İslam Həmrəyliyi Oyunlarında da ölkəmizi layiqincə təmsil ediblər. Hazırda komitənin nəzdindəki bölmələrdə yüzlərlə idmançı məşq edir. Onların sıralarının daha da genişləndirilməsi üçün işlər davam etdirilir. Eyni zamanda, yeni idman bölmələrinin açılması və inkişafı üçün də tədbirlər görülür. Vətən müharibəsində yaralanan əsgər və zabitlərin idmana cəlb edilməsi ilə bağlı fəaliyyət planı hazırlanıb. Həmin plan əsasında qazilərimiz Paralimpiya hərəkatına qoşularaq, döyüş zamanı Qarabağda ucaltdıqları şanlı bayrağımızı yarış meydanlarında da dalğalandıracaqlar”.

Paralimpiyaçılarımızın Tokioda keçirilən XVI Yay Paralimpiya Oyunlarındakı uğurlu çıxışına toxunan İ.Rəhimov qeyd edib ki, milli komandamız mötəbər yarışda 6 idman növü üzrə 34 idmançı ilə təmsil olunub. İdmançılarımız cüdo, atletika, pauerliftinq, güllə atıcılığı, üzgüçülük və parataekvando yarışlarında mübarizə aparıblar. Millimiz Paralimpiya Oyunlarını 19 medalla (14 qızıl, 1 gümüş, 4 bürünc) başa vurublar. Paralimpiadada 163 ölkə iştirak edib. Paralimpiya millimiz qızıl medalların əyarına görə iştirakçı ölkələr arasında 10-cu, Avropada 6-cı, müsəlman ölkələri arasında 1-ci və MDB ölkələri arasında 3-cü yerdə qərarlaşıb. Hazırda AMPK 2024-cü ildə Parisdə keçiriləcək XVII Yay Paralimpiya Oyunlarına hazırlaşır. Qarşımızda duran əsas məqsəd Tokioda əldə olunan nəticələrin qorunması və daha da yaxşılaşdırılmasıdır.

“Yarandığı gündən minlərlə fiziki məhdudiyyətli insanları öz ətrafına yığaraq qarşımıza qoyduğumuz hədəflərə doğru irəliləmişik. Bu gün biz artıq bir idman təşkilatı kimi yox, böyük bir Paralimpiya ailəsi olaraq tanınırıq. Bu gün bütün dünya Azərbaycan paralimpiyaçılarını tanıyır. Bütün bu uğurlara görə paralimpiyaçılarımız Azərbaycan Prezidentinə minnətdardırlar. Əminəm ki, ölkə başçısının, xalqımızın dəstəyini daima hiss edən yenilməzlər bundan sonra da hər birimizi sevindirəcəklər”, - deyə İ.Rəhimov əlavə edib.