Yubo Jay: COP29-da iqlim maliyyəsinə çıxış imkanlarını sadələşdirmək bizim əsas məqsədimiz olmalıdır
Bakı, 15 noyabr, AZƏRTAC
Mən Çindən gəlmişəm. Özəl sektorda çalışıram. Təmsil etdiyim şirkət “yaşıl nəqliyyat” vasitələrinin istehsalı ilə məşğuldur. Dördüncü dəfədir ki, COP konfranslarında iştirak edirəm. Bizim COP29-da iştirak etməkdə əsas məqsədimiz çinli, eləcə də qlobal tərəfdaşlarla əməkdaşlıq qurmaqdır.
Bunu AZƏRTAC-a müsahibəsində Çin nümayəndə heyətinin üzvü Yubo Jay deyib.
Y.Jay COP29 konfransında “yaşıl maliyyə” barədə önəmli müzakirələr aparıldığını qeyd edərək vurğulayıb: "Deyə bilərəm ki, maliyyə sektorunun “yaşıl nəqliyyat” sahəsinə investisiya yatırmasına ehtiyac var. Burada iştirak edən hər bir ölkə və şirkətin COP-la bağlı öz hədəfləri və ambisiyaları mövcuddur. COP29-da iqlim maliyyəsinə çıxış imkanlarını sadələşdirmək bizim əsas məqsədimiz olmalıdır. Burada yüksəksəviyyəli müzakirələr aparılır. İqlimlə bağlı müxtəlif mövzulara toxunulur və bu da məlumat baxımından çox faydalıdır".
Bölmənin digər xəbərləri
