Bakı, 2 oktyabr, AZƏRTAC

Azərbaycan Dövlət “Yuğ” Teatrının yaradıcı heyəti Qazaxıstanda keçirilən "Biken" Beynəlxalq Teatr Festivalında iştirak edəcək.

Bu barədə AZƏRTAC-a teatrdan bildirilib.

Məlumata görə, festival çərçivəsində sənət ocağının yaradıcı heyəti C.Məmmədquluzadənin əsəri əsasında hazırlanmış "Toy dəsgahı" tamaşasını oktyabrın 3-də Rimovoy adına Taldıkorqan Dram Teatrında nümayiş etdirəcək.

Quruluşçu rejissoru Günay Səttar olan "Toy dəsgahı" tamaşasında aktyorlar Vüqar Hacıyev, Təranə Ocaqverdiyeva, Oqtay Mehdiyev, Amid Qasımov, Elgün Həmidov, Günəş Tegin, Nigar Mürsəlova iştirak edirlər.

Qeyd edək ki, festival Qazaxıstanın Xalq artisti Biken Rimovoyun 100 illik yubileyi ilə əlaqədar keçirilir.