Yunanıstanda keçiriləcək beynəlxalq müsabiqəyə hazırlaşan Ləman Kərimli ilə MÜSAHİBƏ
Bakı, 8 aprel, Fidan Əlizadə, AZƏRTAC
Müsahibimiz 260 nömrəli tam orta məktəbin 7-ci sinif şagirdi, eyni zamanda musiqi məktəbinin 5-ci sinfində təhsil alan, öz yaşıdları arasında istedadı və uğurları ilə seçilən Ləman Kərimlidir. O, təkcə musiqi təhsili almır, həm də musiqi ilə yaşayır. Pianonun sədaları onun gündəlik həyatının bir hissəsinə çevrilib. AZƏRTAC-ın müxbiri gənc istedadın yaradıcılıq yoluna işıq salıb.
Ləman musiqiçi ailəsində dünyaya gəlib. Sanki notlar, akkordlar və melodiyalar onun genetik yaddaşına yazılıb. Atası Azərbaycan Milli Konservatoriyasının müəllimi, Əməkdar artist Kamran Kərimovun sənətə olan vurğunluğu Ləmanın qəlbində musiqiyə tükənməz sevgi oyadıb. Onun əmisi qızı Nurel Kərimova hazırda Musiqi Akademiyasında təhsil alır. Bu ailədə musiqi sadəcə bir maraq deyil, həyat tərzidir.
Ləmanın musiqiyə ilk ciddi addımları Rauf Hacıyev adına 15 nömrəli musiqi məktəbində başlayıb. O, Azərbaycanın Əməkdar mədəniyyət işçisi Tamella Məmmədovanın şagirdi olub: “Tamella müəllimə mənə sadəcə notları yox, musiqinin ruhunu dərk etməyi öyrədib. Deyərdim, musiqidəki ilk uğurlarımın təməlini o qoyub”.
Oradakı təhsil dövründə müxtəlif müsabiqələrdə iştirak edən Ləman ilk dəfə Rəşid Behbudov adına Mahnı Teatrında keçirilən festivalda səhnəyə çıxıb. Fikrət Əmirovun məşhur valsını ifa edərək birinci yerə layiq görülüb. Bu qələbə onun musiqi karyerasında ilk addım olsa da, heç də sonuncu olmayıb.
Etüd müsabiqəsində Qran-pri qazanıb, iri həcmli əsərlərin ifasında isə birinci yerə layiq görülüb. Onun istedadı artıq daha geniş auditoriyalara çatıb.
Ləman hazırda Rafiq Babayev adına 25 nömrəli 11 illik musiqi məktəbində təhsil alır. Müəllimi Aytən Nəcəfova ilə çalışmaqdan xüsusi zövq aldığını deyir: “Aytən müəllimə ilə dərslərim çox motivasiyaedici keçir. Mənə təkcə texniki baxımdan deyil, musiqini hiss etmək baxımından da çox şey öyrədir”.
2025-ci ildə “Ümid Beynəlxalq İncəsənət” müsabiqəsinə qatılan Ləman, Frederic Burgmüllerin etüdünü ifa edərək tamaşaçıları və münsifləri heyran edib. Ardınca Qazaxıstanın təşkilatçılığı ilə keçirilən “Astana Stars” festivalında Frédéric Chopin-in “Waltz in C-sharp minor” əsərini səsləndirərək yenidən birinci yerə layiq görülüb.
Ən maraqlısı isə budur ki, Ləman artıq Yunanıstanda keçiriləcək beynəlxalq müsabiqəyə dəvət alıb. “Sənət dərslərimə mane olmur, əksinə, bu beynəlxalq səviyyədə iştiraklar mənim ingilis dilimi və dünyagörüşümü daha da inkişaf etdirir”, – deyə o əlavə edib.
Söhbətimizin sonunda Ləman musiqiyə olan sevgisini belə izah edib: “Pianino mənim üçün sadəcə bir alət deyil, o mənim dostumdur. Özümü onunla ifadə edirəm. Əllərin quruluşu bu işdə çox vacibdir, amma daha vacibi ruhun musiqiyə açıq olmasıdır. Mən bu sahədə özümü tapmışam. Arzum Azərbaycanı dünyada musiqi ilə tanıtmaqdır”.
Gənc istedadımız səhnəyə çıxanda həyəcan keçirmir. Əksinə, bu onun güclü tərəfidir. Hər yeni ifa, yeni səhnə onun üçün bir təcrübə, böyük bir arzuya doğru atılan addımdır.
Bölmənin digər xəbərləri
