YUNANISTANIN BAŞ NAZİRİ KOSTAS KARAMANLİSİN ÇIXIŞI
- Hörmətli cənab Prezident Əliyev!
Hörmətli xanımlar və cənablar!
Biz Prezident Əliyevi Afinada görməkdən çox məmnunuq. Bu dövlət səfəri bizim üçün çox əhəmiyyətlidir. Bu səfər Yunanıstan Respublikasının keçmiş Prezidenti Konstantinos Stefanopulosun Azərbaycana səfərindən sonra baş tutur və ikitərəfli münasibətlərin genişləndirilməsində yeni mühüm addımdır. Biz bu gün Prezident Əliyevlə və onun nümayəndə heyəti ilə danışıqlar apardıq. Həmin danışıqlar ölkələrimiz arasında yeni sahələrdə əməkdaşlığın aparılması üçün yol açdı. Biz qarşılıqlı maraq doğuran məsələləri ətraflı müzakirə etdik. Eyni zamanda, beynəlxalq məsələlərə də toxunduq.
Dünən tərəflər ikiqat vergitutmanın aradan qaldırılması və nəqliyyat sahəsində əməkdaşlığa dair sazişlər imzaladılar. Hesab edirik ki, bu hüquqi çərçivə əməkdaşlığımızın daha da genişləndirilməsi üçün yaxşı şərait yaradır. Əlavə edim ki, imzalanmış digər bir sənəd kommunikasiyalar və informasiya texnologiyaları sahəsinə aid idi. Nəhayət, sonuncu sənəd bərpa olunan enerji mənbələri sahəsində Anlaşma memorandumu adlanır.
Danışıqlar zamanı Yunanıstan və Azərbaycan tərəfləri əməkdaşlığın digər sahələrdə də başlanmasının öz maraqlarına uyğun olduğunu söylədilər. Hazırda yeni sazişlərin imzalanması üçün bir çox təşəbbüslər var. Həmin təşəbbüslərin hamısı bizim dinamik surətdə inkişaf edən ikitərəfli əlaqələrimizdən irəli gəlir. Mən bu işlərdən böyük məmnunluğumu bildirmək istəyirəm. Çünki əldə etdiyimiz irəliləyiş, həqiqətən, böyükdür.
Bugünkü biznes forumu ölkələrimizin işgüzar dairələri arasında işbirliyinin genişləndirilməsi üçün yeni bir fürsətdir. Dövlətlərimizin iqtisadiyyatı bir-birini tamamlayır, rəqabət aparmır. İstəyirik ki, hər iki ölkənin iş adamları qarşılıqlı surətdə sərmayə qoysunlar və ticarət əlaqələrimiz daha da inkişaf etsin. 2007-ci ilin avqust ayında enerji sahəsində əməkdaşlıq haqqında imzaladığımız sazişdən sonra başlanan əməkdaşlığın yeni mərhələsi davam etdirilməlidir. Azərbaycandan başlayan boru kəməri vasitəsilə təbii qazın Türkiyə və Yunanıstan ərazisindən keçərək, İtaliyaya çatdırılmasına dair razılaşmamız var. Bu boru kəməri strateji əhəmiyyətə malikdir və ölkəmizin strateji seçimidir. Həmin boru kəmərinin Türkiyə-Yunanıstan hissəsi 2007-ci ilin noyabrında istismara verilmişdir. İşlər 2005-ci ildə başlanmış və iki il sonra, 2007-ci ildə tamamlanmışdır. Bildirmək istəyirəm ki, həmin boru kəməri Yunanıstanın enerji təhlükəsizliyini möhkəmləndirir. İndi biz gələcəyə baxırıq və boru kəmərinin tam başa çatdırılması ilə əlaqədar müvafiq ölkələrlə daim təmasdayıq. 2007-ci ildə imzaladığımız sazişə əlavə olaraq, birbaşa Azərbaycan qazının alınması ilə bağlı yeni kommersiya müqaviləsini imzalamağa hazırıq.
Cənab prezidentlər, xanımlar və cənablar!
Prezident Əliyevin səfəri əməkdaşlığımızda yeni mühüm addımın atılması üçün əla fürsət idi. Hesab edirəm ki, indi də növbə iş adamlarınındır. Hər bir şey bazardan və iqtisadi imkanlardan asılıdır. Biz Azərbaycanla əməkdaşlıq etməliyik, birgə müəssisələr yaratmalıyıq və ikitərəfli ticarət dövriyyəsinə yeni təkan verməliyik. Bir çox imkanlar var, lakin görüləcək işlər də çoxdur. Hər iki ölkənin hökumətləri bu işdə sizə yardımçı olacaqdır. Mən yaratdıqları imkana görə Afina Ticarət və Sənayə Palatasının üzvlərinə təşəkkürümü bildirirəm.
Cənab Prezident, Sizi Afinada görmək bizim üçün böyük şərəfdir. Yunanıstan və Azərbaycan böyük Qara dəniz regionuna aid olan ölkələrdir, oxşarlıqlarımız da çoxdur. İkitərəfli əməkdaşlığı gücləndirdikdən sonra gələcək daha parlaq ola bilər. Bu işlərdə Sizin xüsusi marağınızı nəzərə alaraq, əminəm ki, növbəti addımlar atılacaqdır.
Bu cür mühüm səfərə və konstruktiv danışıqlara görə Sizə bir daha dərin minnətdarlığımı bildirmək istəyirəm. Hesab edirəm ki, bu gün biz gələcək əməkdaşlığımız üçün daha geniş perspektivlər müəyyən edə bildik.
Diqqətinizə görə təşəkkür edirəm.
X X X
Biznes forumunda hər iki ölkədə biznes imkanlarına və sərmayə mühitinə dair təqdimatlar, şirkətlərin nümayəndələri arasında ikitərəfli görüşlər keçirilmişdir.
######
Bölmənin digər xəbərləri
