Zaqatala meşəçiləri payız əkinini davam etdirirlər
Zaqatala, 8 dekabr (AZƏRTAC). 2013-cü ildə Zaqatala rayonunda dövlət meşə fonduna aid 70 hektar sahədə yeni meşəliklərin salınması planlaşdırılmışdır.
Meşəçilər yaz əkini dövründə 32 hektar sahədə yeni meşəliklər salmışlar. Hazırda rayonda payız meşə əkini kampaniyası davam etdirilir.
Rayon meşə mühafizəsi və bərpası müəssisəsindən AZƏRTAC-a bildirmişlər ki, payız mövsümündə 38 hektar sahədə yeni meşəliklərin salınması nəzərdə tutulmuşdur. Bu məqsədlə müəssisənin 4,5 hektar tinglik sahəsində 730 min ədəd əkin materialı - ting və toxmaçar yetişdirilmişdir. Payız mövsümündə artıq 25 hektar sahədə qoz, şabalıd, akasiya, palıd, katalpa, qovaq və digər növ ağac tingləri əkilmişdir və bu iş davam etdirilir.
Bundan əlavə, payız-qış mövsümünün gəlişi ilə əlaqədar müəssisə və təşkilatların, hərbi hissələrin və vətəndaşların odun yanacağına olan tələbatının ödənilməsi məqsədilə müəssisə tərəfindən kök üstə qurumuş ağacların və seyrəltmə nəticəsində yaranmış tör-töküntülərin hesabına 3 min 290 kubmetr odun yanacağı limiti ayrılmış və daşınması əsasən təmin olunmuşdur.
Hazırda rayon ərazisində dövlət meşə fonduna aid 54 min 103 hektar meşə sahəsi vardır. Bu sahələrin hamısı meşə bitkiləri ilə örtülmüşdür.
Bölmənin digər xəbərləri
