Zaqatalalılar Xocalı faciəsi qurbanlarının xatirəsini anmışlar
Zaqatala, 25 fevral (AZƏRTAC). Zaqatala Rayon İcra Hakimiyyətində Xocalı faciəsinin 20-ci ildönümü ilə əlaqədar tədbir keçirilmişdir.
AZƏRTAC xəbər verir ki, tədbir iştirakçıları əvvəlcə “Şəhidlər” xatirə kompleksinin önünə gül-çiçək düzmüş, Vətən uğrunda şəhid olan həmvətənlərin xatirəsini ehtiramla yad etmişlər.
Rayonda məskunlaşmış Xocalıdan olan məcburi köçkünlərin, ictimaiyyət nümayəndələrinin qatıldıqları tədbirin əvvəlində faciə qurbanlarının xatirəsi bir dəqiqəlik sükutla yad edilmişdir.
Tədbiri rayon icra hakimiyyəti başçısının birinci müavini Elman Ramazanov açaraq erməni millətçilərinin keçmiş sovetlər birliyinin 366-cı motoatıcı alayının köməyi ilə 20 il bundan əvvəl fevralın 25-dən 26-na keçən gecə Xocalı şəhərində törətdikləri dəhşətli faciənin acı nəticələri barədə danışmış, bu qətliamın erməni daşnaklarının Azərbaycan xalqına qarşı yürütdüyü soyqırımı və etnik təmizləmə siyasətinin tərkib hissəsi olduğunu bildirmişdir.
Rayon icra hakimiyyəti başçısının müavini Zümrüd Ağakişiyevanın “Xocalı- qan yaddaşımızdır” mövzusunda məruzəsində insanlığa qarşı ən qəddar və kütləvi terror hadisələrindən olan Xocalı faciəsinin səbəbləri və acı nəticələrindən geniş bəhs olunmuşdur. Diqqətə çatdırılmışdır ki, faciə zamanı 613 nəfər soydaşımış amansızlıqla qətlə yetirilmiş, yüzlərlə insan yaralanmış, 1275 dinc sakin əsir götürülmüş, 150 nəfər itkin düşmüşdür.
Xocalılar amansız soyqırımı günündə də özlərini qəhrəman kimi aparmışlar. Onlar təpədən dırnağa qədər silahlanmış erməni-sovet hərbi birləşmələrinə qarşı qeyri-bərabər döyüşdə igidliklə vuruşmuş, əsl qəhrəmanlıq və şücaət göstərərək, xalqımızın qəhrəmanlıq tarixinə şərəfli səhifələr yazmışlar. Qeyd olunmuşdur ki, yalnız ümummilli liderimiz Heydər Əliyevin xalqın təkidli tələbi ilə yenidən hakimiyyətə qayıdışından sonra Xocalı soyqırımı ilə bağlı həqiqətlərin dünya ictimaiyyətinə çatdırılması istiqamətində məqsədyönlü iş aparılmış və bu yöndə tədbirlər indi də ardıcıl davam etdirilir.
Tədbirdə Xocalıdan olan məcburi köçkün Vaqif Allahverdiyev, rayon veteranlar şurasının sədri Ənvər Kərimov və digər natiqlər birmənalı şəkildə bildirmişlər ki, Xocalı faciəsi xalqımızı sarsıtsa da, onun dözümünü, iradəsini qıra bilməmiş, əksinə, xalqımız bu mübarizədə daha da mətinləşmişdir. Azərbaycan xalqı Ali Baş Komandan İlham Əliyevin əmri ilə torpaqlarımızı mənfur düşməndən azad etməyə hər an hazırdır.
Tədbirin sonunda rayonda məskunlaşmış Xocalıdan olan məcburi köçkün ailələrinə maddi və ərzaq yardımı göstərilmişdir.
Həmin gün rayon mədəniyyət evində xalq teatrının hazırladığı “Xocalıdan gələn səslər” tamaşasına baxış olmuşdur.
Fevralın 26-da isə mədəniyyət evində Xocalı soyqırımından bəhs edən “Xoca” filmi nümayiş etdiriləcəkdir.
Bölmənin digər xəbərləri
