Zelenski: Ukraynanın uzaqmənzilli dronları Krımda Rusiyanın logistikasını məhv edir
Kiyev, 24 sentyabr, AZƏRTAC
“Ukraynanın uzaqmənzilli dronları müvəqqəti işğal olunmuş Krımda rus işğalçılarına dəqiq zərbələr endirir və logistikanı məhv edir”.
AZƏRTAC Ukrayna mediasına istinadla xəbər verir ki, bunu Ukrayna Prezidenti Volodimir Zelenski Nyu-Yorkda keçirilən Krım Platformasının sammitində deyib.
Zelenski qeyd edib ki, Ukraynanın zərbələrinin məqsədi Rusiyanın Krımı böyük hərbi bazaya çevirməsinin qarşısını almaqdır.
“Biz bunu xalqımızın həyatını qorumaq üçün etməliyik. Bizim uzaqmənzilli pilotsuz uçuş aparatlarımız dəqiq zərbələr endirir və Rusiya logistikasına təzyiqimiz öz nəticəsini verir. Rusiya hərbi maşını isə çox ciddi sınaqlarla üz-üzədir”, - deyə Prezident deyib.
Xatırladaq ki, sentyabrın 23-nə keçən gecə Ukrayna qüvvələri işğal olunmuş Krımdakı Kaça aerodromunda iki təyyarəni vurub.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
