Zəlzələ Türkiyə ilə bərabər Azərbaycana da eyni acını yaşatdı
Bakı, 14 fevral, AZƏRTAC
Azərbaycan-Türkiyə qardaşlığı son illərdə özünü ən yüksək səviyyədə göstərib. Qardaş ölkədə fevralın 6-da baş vermiş dəhşətli zəlzələ iki dövləti yenə də yumuruq kimi birləşdirdi.
Ölkələrimiz təkcə yaxşı günlərdə deyil, ən çətin zaman da bir, bərabər olmaqla bütün dünyaya örnək davranışlar sərgilədilər. Belə ki, böyük ərazini əhatə edən dağıntılara, 10 minlərlə insan tələfatına səbəb olan zəlzələ Türkiyə ilə bərabər Azərbaycana da eyni acını yaşatdı. Həm dövlət səviyyəsində, həm də xalq olaraq hamı qardaş dövlət üçün eynilə 44 günlük Vətən müharibəsində olduğu kimi bir yumruq tək birləşdi. Ulu Öndər Heydər Əliyevin “Biz bir millət, iki dövlətik” şüarı tarixi həqiqət kimi öz təsdiqini tapdı.
Bu fikirləri AZƏRTAC-a açıqlamasında Milli Məclisin deputatı Nurlan Həsənov söyləyib.
O qeyd edib ki, qardaş ölkədə baş vermiş zəlzələ ilə bağlı Prezident İlham Əliyev fevralın 6-da Türkiyə Respublikasının Prezidenti Rəcəb Tayyib Ərdoğana zəng edərək çoxsaylı insan tələfatı və dağıntılarla bağlı xəbərin Azərbaycanı çox sarsıtdığını və kədərləndirdiyini bildirdi.
Dövlətimizin başçısı zəlzələ zamanı həlak olanlarla bağlı Rəcəb Tayyib Ərdoğana, onların ailələrinə və qardaş Türkiyə xalqına şəxsən öz adından və xalqımız adından başsağlığı çatdırdı, yaralananların tezliklə şəfa tapmasını dilədiyini dedi. Prezident İlham Əliyev, həmçinin vurğuladı ki, Azərbaycan və Türkiyə hər zaman bir-birinin yanındadır.
“Zəlzələdən dərhal sonra dövlətimizin başçısının tapşırığına əsasən, 420 nəfərdən ibarət xilasedici heyət qardaş ölkəyə göndərildi və hadisə yerinə çatan kimi Türkiyədən olan həmkarları ilə birlikdə dərhal fəaliyyətə başladılar. Bundan sonra da Türkiyə Respublikasında güclü zəlzələnin fəsadlarının aradan qaldırılması və axtarış-xilasetmə əməliyyatlarına dəstək məqsədilə Fövqəladə Hallar Nazirliyinin növbəti yardımları və xilasetmə qrupları qardaş ölkəyə yola salındı. Həmçinin Heydər Əliyev Fondu tərəfindən Azərbaycan Respublikasının Birinci vitse-prezidenti Mehriban xanım Əliyevanın tapşırığı ilə bir neçə təyyarə Türkiyədə zəlzələ baş verən ərazilərə tibbi ləvazimatlar, isti geyimlər və çadırlar çatdırdı.
Lakin Azərbaycan xalqının dəstəyi təkcə dövlət səviyyəsində deyil, əhali arasında da qardaş dövlətə sevgini, diqqəti ən yüksək şəkildə göstərdi. Belə ki, imkanı zəif vətəndaşlarımız belə əllərində olan bütün imkanlarını səfərbər edərək Türkiyə xalqının yanında olduğunu açıq şəkildə nümayiş etdirirlər. Belə ki, ölkəmizin bütün bölgələrində Türkiyəyə yardımlar toplanır, hər kəs bacardığı qədər öz köməyini göstərir. Eyni zamanda, bu faciənin fəsadlarının aradan qaldırılması ilə bağlı istər dövlət qurumları, istər könüllü təşkilatları, istərsə də özəl təşkilatlar var gücləri çalışırlar. Bu da tarixin sınaqlarından çıxan, illər keçdikcə daha da möhkəmlənən bağlılığın, birliyin, həmrəyliyin, qardaşlığın əməldə göstəricisidir. Türkiyə-Azərbaycan birliyi bir daha dünyaya sübut edir ki, onlar hər zaman bir yerədirlər”, - deyə Nurlan Həsənov vurğulayıb.
Bölmənin digər xəbərləri
