Bakı, 11 mart, AZƏRTAC

“Zirə” futbol klubunun kapitanı Qismət Alıyev AZƏRTAC-a müsahibə verib. Yarımmüdafiəçi komandasının çıxışı və milli komanda barədə danışıb:

- Misli Premyer Liqasının XXVI turunda gərgin keçən oyunda “Səbail”i 90+6-cı dəqiqədə vurulan qolla məğlub etdiniz. Qələbənin bu qədər çətin başa gəlməsinin səbəbini nədə görürsünüz?

- "Səbail" son oyunlarda baxımlı futbol nümayiş etdirir. Matçların çoxunda qələbəyə yaxın olsalar da, xırda səhvlərə görə məğlub olublar. Cavid Hüseynovun gəlişindən sonra müsbət dəyişikliklər var. Bilirdik ki, bizi çətin rəqibə qarşı görüş gözləyir. Qol imkanlarımız çox oldu. Sadəcə, qol son dəqiqədə vuruldu.

- Hazırda komandanız 51 xalla turnir cədvəlinin ikinci pilləsində qərarlaşıb. Məqsədiniz çempionluqdur, yoxsa hazırda olduğunuz yeri qorumaq?

- Bizim məqsədimiz ikinci pilləni tutmaqdır. Yadınızdadırsa, birinci dövrənin sonlarına yaxın 13 xal "Araz-Naxçıvan"dan, 7 xal "Turan Tovuz"dan geridə idik. Qarşıda hələ 10 oyunumuz var. Çempionatın elə yerindəyik ki, heç bir rəqib rahatlıqla qələbə qazana bilmir. "Səbail"lə son oyun buna sübutdur. İndi fikrimiz qarşıdan gələn matçlarda müsbət nəticələr əldə etməkdir.

- Necə düşünürsünüz, “Zirə”nin çempion olması üçün yenə də vaxt lazımdır, yoxsa komanda artıq bu titulu qazanmağa hazırdır?

- Azərbaycan çempionatı ildən-ilə daha da çətinləşir. "Qarabağ"ın gücünü hər kəs bilir. İstər yerli liqada, istərsə də Avropa arenasında böyük təcrübəyə malikdirlər. Onlar da bizim olduğumuz yoldan keçiblər. Çalışırıq ki, oyundan-oyuna inkişaf edək. Avropada çıxış edərək təcrübə toplayaq. "Zirə"yə zaman lazımdır. Gələcəkdə daha da yaxşı olacağıq.

- Azərbaycan çempionatında növbəti mövsümdən legioner limiti tətbiq olunmayacaq. Sizcə, limitin ləğvi ölkə futboluna nə kimi müsbət və ya mənfi təsir göstərə bilər?

- Legioner limitinin ləğvinin müsbət və mənfi tərəflərini zaman göstərəcək. Biz yenə də futbolçu olaraq öz işimizi görməliyik. Bu barədə məşqçilər, futbol mütəxəssisləri danışsa, daha yaxşı olar.

- Qarşıda Azərbaycan millisini Haiti və Belarusla yoldaşlıq oyunları gözləyir. Milli komandanın baş məşqçisi Fernandu Santuşdan dəvət gözləyirsiniz?

- Milli komandanın formasını geyinmək hər bir futbolçu üçün böyük qürurdur. Əlbəttə ki, baş məşqçi dəvət göndərsə, yığmada canla-başla oynamağa hazıram.

- Azərbaycan millisi dünya çempionatının seçmə mərhələsində Fransa - Xorvatiya cütünün qalibi, İslandiya və Ukrayna yığmaları ilə eyni qrupda yer alıb. Rəqibləri dəyərləndirərkən hansı yığmadan xal ala biləcəyimizi düşünürsünüz?

- Qrupdakı rəqiblərimizin son illər istər dünya, istərsə də Avropa çempionatlarında yaxşı təcrübələri var. İndidən hansı yığmadan xal alacağımız barədə nəsə demək düzgün olmaz. Həmin matçlarda istəklə oynamalıyıq. Onlar xırda səhvləri belə bağışlamırlar.

- Seçmə mərhələyə hazırlıq üçün Haiti və Belarusla keçiriləcək yoldaşlıq görüşləri Azərbaycan millisinə nə dərəcədə fayda verə bilər?

- Hər iki görüş yoxlama xarakterli oyundur. Məncə, həmin matçların faydasını gələcək qarşılaşmalarda hiss edəcəyik.